Dıdar Smaǵulov memlekettik basqarýdyń tıimdiligin arttyrý joldaryn aıtty

ASTANA. QazAparat – Qoldanystaǵy qosymshalardyń múmkindikterin paıdalaný arqyly qarjy shyǵarmaı-aq memlekettik qyzmet sapasyn, memlekettik basqarýdyń tıimdiligin arttyrýǵa bolady. Bul týraly «Ádildik joly» RQB atqarýshy dırektory Dıdar Smaǵulov «Ashyq Úkimet jáne basqarýdyń jańa mádenıeti: estý, túsiný, áreket etý» halyqaralyq ǵylymı-tájirıbelik konferentsııasynda aıtty, dep habarlaıdy QazAqparat tilshisi.

Qoǵam belsendisi tsıfrlyq úkimet baǵytynda ótken sessııadaǵy baıandamasynda naryqtaǵy qosymshalardyń múmkindikterin paıdalaný arqyly memlekettik qyzmet kórsetý sapasyn jaqsartýdyń, memlekettik basqarýdyń tıimdiligin arttyrýdyń joldaryn usyndy.

«Memlekettik qyzmet kórsetý salasyndaǵy máselelerdi sheshý úshin bıýdjetten qyrýar qarjy bólmeı, naryqta bar qosymshalardy qoldaýdy usynamyn. Qoldanystaǵy dúnıelerdi memlekettik basqarý júıesine engizý jáne memlekettiń tıimdiligin arttyrý úshin paıdalaný kerek ekenin aıttym. Mysaly, 2gis qosymshasynda qanshama aqparat, mıllıondaǵan qoldanýshy bar jáne ony bıýdjetten qosymsha qarjy bólmeı-aq tıimdi paıdalanýǵa bolady. 2gis qosymshasyn 9 mln adam qoldanady, pikirlerin sonda jazady. Biraq, memlekettik mekemeler onda jazylǵan pikirlerge jaýap bermeıdi, al jekemenshik kompanııalar ony tıimdi paıdalanyp, qyzmet kórsetý sapasyn arttyryp otyr», - dedi ol.

Osy oraıda, memlekettik satyp alýdyń sapasyn baqylaý úshin bıýdjet qarjysyna salynǵan memlekettik úılerge, mektepterge, aýrýhanalarǵa qansha aqsha bólindi, jol sapasy qandaı, oǵan bólingen qarajat týraly aqparatty sol qosymsha arqyly kórsetýge bolatyndyǵyn aıtady.

«Osylaısha, halyqpen keri baılanys ornatýǵa, qoldanystaǵy qosymshalardyń múmkindikterin paıdalaný arqyly qarjy shyǵarmaı-aq memlekettik qyzmet sapasyn, memlekettik basqarýdyń tıimdiligin arttyrýǵa bolady. Memleket naryqqa jańasha kózqaraspen qaraýy tıis», - dedi Dıdar Smaǵulov.