Dıdar Qarymsaqov: JI mınıstrligi startaptardy damytýǵa $1 mlrd ınvestıtsııa salady

ASTANA. KAZINFORM – Digital Bridge 2025 forýmy alańyndaǵy «Jibek Joly» arnasynyń mobıldi stýdııasynda «Qazaqstan Investment Corporation» AQ tóraǵasy Dıdar Qarymsaqov Qazaqstannyń jasandy ıntellekt (JI) salasyndaǵy damý baǵyty men startaptardy qoldaý tetikterine toqtaldy.

- Norvegııanyń ınvestıtsııalyq qory – 1,8 trıllıon dollar. Olar JI engizý arqyly orasan qarajat únemdep otyr. Qazaqstan da osy baǵytqa bet buryp keledi. Sonyń bir dáleli – jaqynda JI mınıstrliginiń ashylýy, – dedi Dıdar Qarymsaqov.

Maman startaptardyń damýyna kedergi keltirip otyrǵan úsh negizgi máseleni atady.

- Birinshi – qarjynyń tapshylyǵy. Mysaly, búgin tanystyrylǵan «Unicorn» startapyna 250 myń dollar ınvestıtsııa berildi. Biraq mundaı kólemdegi qarajatty Qazaqstanda tabý ońaı emes. Bul máseleni sheshýge endi JI mınıstrligi jumylady. Onyń janyndaǵy «Alem» qory startaptarǵa 1 mıllıard dollar ınvestıtsııa salmaq. Ekinshi másele – mamandardyń shetelge ketýi. Bul protsesti júıeleýimiz kerek. Úshinshiden, ishki naryqtyń tarlyǵy. Qazaqstannyń naryǵy shekteýli. Biz endi kemi Ortalyq Azııa men Qytaı naryǵyna shyǵýǵa tıispiz», – dedi ol.

Aıta keteıik, búgin Astanada Digital Bridge 2025 halyqaralyq tehnologııalyq forýmy bastalǵan edi.