Dıdar Qamı Atyraýdaǵy halyqaralyq aıtystyń bas júldesine ıe boldy

Atyraýda Sultan Beıbarystyń 800 jyldyǵyna arnalǵan «Erligi eren er babam!» atty halyqaralyq aıtys ótti. Eki kúnge sozylǵan aıtystyń bas júldesin Dıdar Qamı ıelendi, dep habarlaıdy QazAqparat tilshisi.

Halyqaralyq aıtysqa Qazaqstannan 11, Qyrǵyzstannan 2, Mońǵolııadan 1 aqyn qatysty.

Aıtyskerlerdiń Mahambet atyndaǵy akademııalyq qazaq drama teatryndaǵy jyr báıgesin Qazaqstan Jazýshylar odaǵynyń basqarma tóraǵasy Mereke Qulkenov tóraǵalyq etken qazylar alqasy saralady.

Aıtys eki kúnge sozyldy. Ekinshi kezeńge 8 aıtysker shyqty.

Qazylar alqasynyń sheshimimen aıtystyń bas júldesi – 1 mln teńge Qaraǵady oblysynan qatysqan tájirıbeli aqyn Dıdar Qamıǵa berildi. Al birinshi júldege – 750 myń teńgege Erkebulan Qaınazar (Astana) ıe boldy.

Ózindik sóz saptaýy, máneri bar Ónerbek Dáýlekenov (Atyraý oblysy) ekinshi júldeniń 600 myń teńgesin ıelendi. Al, úshinshi júlde – 500 myń teńge eki aıtyskerge berildi. Onyń biri – Batys Qazaqstan oblysynyń týmasy Talǵat Myqı, al ekinshisi – Qyrǵyzystannan kelgen Esenbek Kııızbaev.

Sondaı-aq, Batyrjan Kádirbaı (Atyraý oblysy), Raýan Qaıdarov (Pavlodar oblysy), Baýyrjan Shırmedınuly (Batys Qazaqstan oblysy) arnaıy júldeni ıemdendi.

"Kórermen aıtystyń qyzyqty ótkenin qalaıdy. Qarsylasy myqty bolsa, aıtyskerler de ashyla túsedi. Shabyty oıanady. Memleket basqarǵan tarıhı tulǵa Sultan Beıbarys babamyzǵa arnalǵan halyqaralyq aıtys joǵary deńgeıde, ári ádil ótti. Atyraýda ótken aıtystan ekinshi ret bas báıge alyp turmyn", - dedi Dıdar Qamı.

Al Qyrǵyzstannan kelgen Esenbek Kııızbaevtyń aıtýynsha, mundaı halyqaralyq aıtys kóbirek ótkeni jón.

"Qazaq pen qyrǵyzdyń dostyǵyn jyrǵa qostym. Óıtkeni eki eldiń aqyn-jazýshylary bir-biriniń shyǵarmashylyǵyn qoldaǵanyn bilemiz. Biz de sol joldy jalǵaǵymyz keledi", - dedi Esenbek Kııızbaev.