Dıdar Qalıahmet: Pyshaqty kórdim, biraq ózimdi ǵana qorǵaýǵa tyrystym

TALDYQORǴAN. KAZINFORM – Jetisý oblysynyń mamandandyrylǵan aýdanaralyq sotynda Sherzat Polattyń ólimine qatysty qylmystyq is qaralyp jatyr. Búgingi sot otyrysynda  aıyptalýshy Dıdar Qalıahmet jaýap berip, qylmys jasalǵan sáttegi jaǵdaıdy baıandap berdi.

– 2024 jyldyń 4 qazan kúni saǵat 00:30 shamasynda aǵam Sanat Ábdiqadyr jáne inim Dáýlet Muratov úsheýimiz monshadan shyqqan soń Shota Rýstavelı kóshesimen júrip, «Qamajaı» dúkeniniń aldyna toqtadyq. Sol jerde bir top jigitpen jolyqtyq, olar amandasty. Sol sátte Ǵaıypbaev aǵam Sanatty toqtatyp, «Tóbeleske keldińder me?» dep surady. Aǵam: «Men shalmyn ǵoı» dep jaýap qatty. Oǵan Nurqanat: «Shalǵa uqsamaısyń» dedi», – dedi Qalıahmet.

Oqıǵa barysyn odan ári tarqatqan aıyptalýshy bylaı deıdi:

– Sol kezde men de Nurqanat pen Sanattyń janyna bardym. Artynsha biz dúkenge kirdik, ishinde eshkim bolmady. Eki bótelke syra alyp, kassaǵa jaqyndadym, biraq satýshy tabylmady. Sodan keıin dúkenge eki qyz kirdi, artynan Azamat keldi. Qarjaýbaı da kelip, oǵan Sanat syranyń aqshasyn tóledi. Sol sátte dalada shý estildi. Qarjaýbaı bizdi dúkennen shyǵaryp jiberdi. Syrtqa shyqqanda artyma qarasam, Qarjaýbaıdyń qolynan pyshaqtyń júzi jyltyrap kórindi. Ózimdi qorǵaý úshin Qarjaýbaıdyń qolynan ustap, «qoı, qoı» dep toqtatýǵa tyrystym. Qasymdaǵy balalar da Qarjaýbaı aǵaıǵa sabyr saqtaýdy ótinip jatty. Sol sátte bireý meni kıimimnen tartyp qaldy. Keıin beınejazbadan onyń Shyńǵys ekenin kórdim, – dep túsindirdi sottalýshy.

Dıdar Qalıahmettiń aıtýynsha, keıin syrtqa shyǵyp Nurqııaspen amandasyp, kólikke otyrǵan. Sol sátte myltyq daýysyn estigen.

– Kólikti toqtatyp, Sanat pen Dáýletke «Otyra turyńdar, men baryp ne bolǵanyn kórip keleıin» dedim. Shota Rýstavelı kóshesine qaıta barǵanymda jigitter tóbelesip jatqanyn kórdim. Jaqyndaı bergenimde «Meniń bala-shaǵam bar» dep, artqa sheginip, kólikke minip kettim. Sanattyń úıine baryp, sol jerden jubaıym kelip alyp ketti, – dedi ol.

Sonymen qatar Dıdar Qalıahmet sot barysynda sottalýshylardyń keıbirimen burynnan tanys ekenin aıtty. Onyń aıtýynsha, Shynasyl Abzaldy mektep kezinen tanıdy, Nurqııasty bala kezden biledi, al Ravıldi tek bir ret – ótken jyly toıda kórgen. Degenmen ol sottalýshylardyń eshqaısysymen tyǵyz baılanysy joq ekenin málimdedi.

Aıta keteıik, Abzal Shynasyl kimdi pyshaqtaǵanyn aıtty.

Sherzat isindegi basty aıyptalýshy osyǵan deıingi sózinen bas tartqany jaıly jazǵan bolatynbyz.

Eske sala keteıik, Sherzat Polattyń ólimine qatysty sotta taǵy bir sottalýshy aıyptaý aktisimen kelispeıtinin aıtqan.

Taǵy bir sottalýshy Nurqııas Іlııasov myltyqpen urý sebebin túsindirse, Azamat Toqtaýbaev ótirik aıǵaq bergenin rastady.

Kámeletke tolmaǵan taǵy bir aıyptalýshy Dýman Ysqaq ózine taǵylǵan aıypty moıyndamady.

Aıta keteıik, Sherzat Polattyń ólimi boıynsha alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasóspirim qaza bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzattyń aǵasy Nurqanat Ǵaıypbaevtyń denesi tabyldy.