Dıdar Hamza Túrkistan oblysynyń úzdik sportshysy atandy
TÚRKІSTAN. QazAqparat - Búgin Túrkistan qalasynda aǵymdaǵy jyldy qortyndylaryna arnalǵan jıyn ótti. Jıynda Túrkistan oblysynyń ákimi Janseıit Túımebaev jurtshylyqty Jańa jyl merekesimen quttyqtap, bir jyl boıy eńbegimen daralanǵan ár túrli sala qyzmetkerlerin marapattady, dep habarlaıdy QazAqparat tilshisi.
Saltanatty is-sharada jyldyń úzdik 15 mekemesi men kásipornyna marapat tapsyryldy. Sondaı-aq, «Salanyń úzdik memlekettik qyzmetshi» atalymy boıynsha 7 adamǵa qurmet kórsetildi. Aımaq basshysy jeńimpazdarǵa jyly lebizin jetkizdi.
«HHІ ǵasyrdyń belsendi azamattary básekege qabiletti bolýy tıis. Qazirgi kezeńde elge qyzmet etip otyrǵan azamattar shyǵarmashylyqqa beıim, erkin oıly, kreatıvti ári zııaly bolǵany jón. Atalǵan izgi qasıetter barlyq sala qyzmetkerleriniń boıynan tabylýy qajet. Bul - búgingi zamannyń talaby. Búgin talaı syndardan súrinbeı ótken naǵyz dúldúlder ortamyzǵa kelip otyr. Osynaý jetistikterińizben shyn júrekten quttyqtaımyn! Aldaǵy ýaqytta da memleket pen qoǵam múddesi jolynda talmaı eńbek etip, belsendi azamattyq ustanymmen ortaq maqsatty júzege asyrýǵa úles qosatyndyqtaryńyzǵa senimdimin. Túrkistanǵa qyzmet etý - abyroıly mindet. Búgingi marapattaryńyz Sizderge shabyt berip, jańa shyńdarǵa jeteleıdi dep oılaımyn», - dedi Janseıit Túımebaev.
Aıta keteıik, marapattalǵandardyń arasynda «Green Technology Industries» JShS, «Yrys» mıkroqarjy uıymy, oblystyq klınıkalyq aýrýhanasy jáne ózge de mekemeler bar. Sonymen birge, kásipkerlik, týrızm, ekonomıka, qarjy, rýhanııat jáne mádenıet, densaýlyq saqtaý, sport, qurylys, bilim, aýyl sharýashylyǵy, muraǵat, turǵyn úı - kommýnaldyq sharýashylyq, energetıka jáne ózge de salalar boıynsha 40 adam marapattaldy.
Jyldyń úzdik sportshysy ataǵyna Dıdar Hamza ıe bolsa, Ádihan Polatbekov jyldyń úzdik qurylysshysy dep tanylǵan. Jyl agronomy bolyp Bolatbek Qumetov tanylsa (Shardara aýdany), Muqaǵalı Kenjetaıuly jyl aqyny atandy. Jyldyń eń úzdik qyzmetkerleri marapattalǵan jıynda ánshi-bıshiler óner kórsetip, kontserttik baǵdarlamasyn usyndy.
