Dıdar Amantaı máńgilik qundylyqtar jasaýshylardyń biri - mádenıettanýshy Murat Áýezov
ALMATY. 25 qańtar. QazAqparat - Dıdar Amantaıdyń shyǵarmalarynyń búgingi tańda kóptegen tilderge aýdarylyp jatqany zańdy qubylys.
Mádenıettanýshy Murat Áýezov búgin Almatyda qalamgerdiń «Qarqaraly basynda» kitabynyń túrik, frantsýz, mońǵol tilderindegi nusqalarynyń tanystyrylymynda osylaı aıtty.
«Dıdar tarıhpen, ótken zamanmen jáne úlken keńistikpen til tabysa alatyn jazýshylyq qasıetin kórsetip otyr. Óıtkeni ol máńgilik qundylyqtardy týdyrýshy. Jalpy bireýdiń shyǵarmalaryn basqa tilderge aýdarý shyǵarmashylyq jaǵynan óte qıyn nárse. Onyń nátıjesi árdaıym sátti bola bermeıdi», - deıdi M.Áýezov. Qoǵam qaıratkeriniń aıtýynsha, Dıdar týraly keıbireýlerdiń «qazaq týraly az aıtady», «kosmopolıt» degen sózder shyndyqqa saı kelmeıdi. Onyń ózindik erekshe stıli bar. Ózge elden óz oqyrmanyn tabý kez kelgen jazýshynyń mańdaıyna buıyra bermeıtin úlken baq.
