Dıastazdy úı jaǵdaıynda qalpyna keltirýge bolady – gınekolog

ASTANA. KAZINFORM – Búginde bosanǵan áıelder arasynda dıastaz dıagnozy jıi kezdesedi. Mamandardyń aıtýynsha, ishtiń alǵa shyǵyp turýy, adamnyń aryq bolsa da ishiniń úlken bolyp kórinýi, kindik tusynyń tompaıýy medıtsınada «dıastaz» dep atalady. 

Іshtiń sozylyýyn qalpyna keltirýge bola ma? Dıastazdyń asqynýy qandaı? Osy jáne ózge de suraqtarǵa gınekolog Aıjan Ahmetjanova Jibek Joly arnasyndaǵy «Búgin Live» baǵdarlamasyna bergen suhbatynda jaýap berdi.

– Qazirgi tańda dıastaz áıelder arasynda jıi tirkeledi. Onyń negizgi sebebi – júktilik kezeńinde bólinetin relaksın gormony. Bul gormon jatyrdyń ulǵaıýyna baılanysty ishtiń aldyńǵy tik bulshyqetterin sozady. Eger bosanǵannan keıin alty aıdan bir jylǵa deıin bulshyqetter tolyq qalpyna kelmese, dıastaz turaqty kúıde qalyp qoıýy yqtımal. Bul másele erlerde de kezdesedi. Ol artyq salmaq, arqa bulshyqetterin durys ustamaý, sondaı-aq aýyr fızıkalyq eńbek saldarynan paıda bolýy múmkin. Mundaı jaǵdaıda aldyńǵy tik bulshyqetterge shamadan tys kúsh túsip, olardyń ajyraýyna ákeledi, - deıdi ol. 

Dárigerdiń aıtýynsha, dıastaz deńgeıin úıde óz betimen tekserýge bolady. Ol úshin shalqadan jatyp, saýsaqpen kindik tusyndaǵy aq syzyq boıyn basyp kóredi. Sonymen qatar ýltradybystyq zertteý (ÝDZ) arqyly da naqty dıagnoz qoıylady.

– ÝDZ nátıjesinde tik bulshyqetter arasyndaǵy ajyraý qashyqtyǵy anyqtalady. Eger ajyraý 2 santımetrden assa – ortasha deńgeı, al 5 santımetrden joǵary bolsa – aýyr deńgeı dep baǵalanady. Kóbine dıastazdyń orta jáne aýyr dárejesinde asqyný retinde medıtsınalyq jaryq paıda bolýy múmkin. Eger jaryq qapshyǵynyń ishinde tinderdiń qysylyp qalýy nemese nekroz belgileri anyqtalsa, mundaı jaǵdaıda hırýrgııalyq em – operatsııa jasaý qajet bolady, - dedi Aıjan Ahmetjanova. 

Osy tusta maman dıastazdy ózdiginen qalpyna keltirýge bolatynyn aıtty. Bul rette úı jaǵdaıynda jattyǵýlardy durys ári júıeli oryndaý kerek.

– Kóp jaǵdaıda ishti jııý úshin jasalatyn klassıkalyq press jattyǵýlary kerisinshe áser berip, bulshyqetterdiń odan ári ajyraýyna sebep bolýy múmkin. Ásirese, bel aımaǵyna kúsh túsiretin jattyǵýlardan saq bolý qajet. Dıastaz kezinde dıafragmalyq tynys alý jattyǵýlary tıimdi sanalady. Bul ádis ishtiń tereń bulshyqetterin belsendi jumysqa qosyp, olardy birtindep qalpyna keltirýge kómektesedi. Tynys alý barysynda ish tolyqtaı ishke tartylýy tıis. Sondaı-aq qyz balalarǵa júktilikke deıin turaqty túrde sportpen aınalysqany durys. Sebebi burynnan jattyqqan bulshyqetter júktilik kezinde de serpimdiligin saqtap, bosanǵannan keıin tezirek qalpyna keledi. Al bosanǵannan keıin jattyǵýdy birden jáne óz betinshe bastaý keı jaǵdaıda ishtiń tómengi bóliginde bulshyqettiń úıilip qalýyna ákelýi múmkin. Bul – jattyǵýdyń durys oryndalmaı jatqanyn kórsetetin belgi, - deıdi gınekolog. 

Eske sala keteıik, jaqynda epılepsııa derti jaıly da jazǵan edik.