Dıas Jırenbaev ISU Gran-prı kezeńderine qatysýy múmkin

ASTANA. KAZINFORM – Qazaqstandyq mánerlep syrǵanaýshy Dıas Jırenbaev Halyqaralyq konkımen júgirýshiler odaǵynyń (ISU) Gran-prı serııasy kezeńderine qatysatyn qosalqy sportshylardyń jańartylǵan tizimine endi. Bul týraly Sports.kz habarlady.

Dıas Jırenbaev
Foto: Sport jáne dene shynyqtyrý isteri komıteti

Amerıkalyq jýrnalıst Djekı Vong X áleýmettik jelisindegi paraqshasynda ISU jarys kezeńderinde sportshylar jınaǵan upaılar qosalqy qatysýshylar tizimindegi ornyn anyqtaý kezinde eskeriletinin rastaǵanyn jazdy. Baǵdarlamanyń tórt túri boıynsha qosalqy sportshylar tizimi 22 qazannan beri endi jańartyldy.

Erler arasyndaǵy jekeleı synda Dıas Jırenbaev 208,68 upaımen 23-orynda tur. Qosalqy sportshylar tiziminiń alǵashqy eki satysyna beıtarap mártebede óner kórsetetin reseılikter Evgenıı Semenenko (292,09 upaı) men Petr Gýmennık (261,76 upaı) jaıǵasqan. Úshinshi orynda meksıkalyq Donovan Karrılo (240,38 upaı).

Bul tizimge ený mánerlep syrǵanaýshylarǵa Gran-prı serııasynyń negizgi kezeńderinen jarystan shyǵyp qalǵan sportshylardyń ornyna qatysýǵa múmkindik beredi. Alaıda bul múmkindik serııanyń fınaldyq týrnırine qoldanylmaıdy.

Sonymen qatar Dıas Jırenbaev 20-22 qarashada Helsınkıde ótetin Finlandia Trophy týrnırine qatysa almaıdy. Vıza máselesine baılanysty Evgenıı Semenenko jarystan bas tartqannan keıin onyń ornyna qosalqy sportshylar tiziminde qazaqstandyq mánerlep syrǵanaýshydan joǵary turǵan ızraıldik Tamır Kýperman shaqyryldy.

Buǵan deıin Qazaqstan atynan Gran-prı kezeńderinde Mıhaıl Shaıdorov pen Sofıa Samodelkına óner kórsetken edi. Alaıda olardyń ekeýi de jarysty aıaqtap, fınaldyq kezeńge joldama ala almady.

Aıta keteıik, Sofıa Samodelkına AQSh-taǵy Gran-prı kezeńinde besinshi oryn aldy.

Buǵan deıin qazaqstandyq eki mánerlep syrǵanaýshy Estonııadaǵy Challenger týrnırinde baq synaıdy.