Dıas Moljigitov Taılandtaǵy týrnırde fınalda qytaılyq qazaqty jeńip ketti

ASTANA. KAZINFORM — Taıland astanasy Bangkokta ótip jatqan bokstan Thailand Open halyqaralyq týrnırinde Dıas Moljigitov (80 keli) chempıon atandy. 

Qazaqstandyq bylǵary qolǵap sheberi fınalda Qytaı quramasyndaǵy etnıkalyq qazaq Toqtarbek Tańatqannan basym tústi.

Aıta ketsek, budan buryn elimizdiń erler quramasynan Tórehan Sabyrhan (70 keli) chempıon atandy.

Halyqaralyq týrnırge erler quramasynda 10 boksshy bardy. Olardyń arasynan Dıas pen Tórehannan basqa Dýlat Bekbaýov (65 keli), Danııar Rahymberdıev (90 keli), Bekzat Tańatar (85 keli) men Nursultan Altynbek (55 keli) qola júldeni qanaǵat tutty.

Endi áıelder quramasynda Vıktorııa Grafeeva (60 keli), Natalıa Bogdanova (70 keli), Nadejda Rıabets (75 keli), Gúlsaıa Erjan (80 keli) jáne Eldana Tálipova (80 keliden joǵary) sharshy alańǵa shyǵady.

Dástúrli týrnır 24 mamyr men 1 maýsym aralyǵynda ótkizilip jatyr. Oǵan Qytaı, Koreıa, Japonııa, Ózbekstan, Qazaqstan, Taıland jáne taǵy basqa eldiń bylǵary qolǵap sheberleri qatysady dep josparlanǵan.