Dıas Kenjebek para júzýden Azııa rekordyn jańartyp, qurlyqtyq dodanyń chempıony atandy
ASTANA. KAZINFORM — Aıchı-Nagoıada (Japonııa) ótip jatqan V Azııa Para oıyndarynda qazaqstandyq para júzýshi Dıas Kenjebek altyn medal jeńip alyp, Azııa rekordyn jańartty.
Erler arasynda S10 sanaty boıynsha 100 metrge shalqalaı júzý saıysynyń fınalynda Dıas Kenjebek 1 mınýt 1,98 sekýnd nátıjemen márege birinshi bolyp jetti. Osylaısha ol Azııanyń buǵan deıingi 1 mınýt 3,73 sekýndtyq rekordyn jańartty.
Sondaı-aq búgin, 20 qazanda ol SM10 sanatynda 200 metrge keshendi júzýden 2:21.61 ýaqyt nátıjesin tirkep, kúmis aldy.
Bul — Qazaqstan quramasynyń V Azııa Para oıyndaryndaǵy besinshi altyn medali. Osylaısha Dıas Kenjebektiń enshisinde úsh medal bar. Ol buǵan deıin 100 metrge erkin stılde júzýden (S10) kúmis alǵan edi.
Eske salaıyq, buǵan deıin Beksultan Qulmyrza dzıýdodan Azııa Para oıyndarynda top jarǵanyn habarlaǵanbyz.
