Dıas Qadyrbaevtyń qorǵaýshylary bostondyq sottan onyń FBR-ge bergen málimdemesin eskermeýdi surady
ASTANA. QazAqparat - Amerıkandyq Bostonda (Massachýsets shtaty) bolǵan qastandyqqa qatysty tergeýge kedergi keltirdi degen aıyp taǵylǵan qazaqstandyq Dıas Qadyrbaevtyń qorǵaýshylary dúısenbi kúngi tyńdalymda sottan onyń ustalǵannan keıingi bılik ókilderimen áńgimesi barysynda jasaǵan málimdemelerin eskermeýin surady, dep habarlaıdy ITAR-TASS.
Buǵan negizdeme retinde qorǵaýshylar lıngvıstıka salasynyń sarapshysy - Templ ýnıversıtetiniń (Pensılvanııa shtaty) professory Anet Pavlenkonyń pikirin keltirdi. Boston federaldyq sotynyń tyńdalymynda ol Qadyrbaev aǵylshyn tilin jaqsy meńgermegenin aıtqan. Osylaısha, Pavlenkonyń sózine qaraǵanda, jas jigit 2013 jyldyń sáýirinde ustalǵannan keıin AQSh Federaldyq tergeý bıýrosy (FBR) agentteri quqyqtaryn, sonyń ishinde qorǵaýshyǵa jáne málimdeme jasamaý quqyqtaryn aıtqanda durys túsinýi ekitalaı.
Qadyrbaevtyń qorǵaýshylary sondaı-aq, FBR agentteri suraý kezinde onyń osal tusyn, aǵylshyn tilin jetik meńgermegenin paıdalanyp óz aılalaryn iske asyrmaq bolǵanyn aıtty. Dúısenbi kúngi tyńdalymda Qadyrbaev aýdarmashynyń qyzmetine júgingen. The Boston Globe gazeti osyǵan deıingi tyńdalymdarda mundaı qyzmet oǵan qajet bolmaǵanyn jazdy.
Aıyptaýshylardyń málimetterine saı, Qadyrbaev jáne Qazaqstannan barǵan taǵy bir stýdent - Azamat Tájaıaqov - 2013 jyly sáýirde Bostondyq marafonda terakt jasady dep seziktelip otyrǵan Djohar Tsarnaevpen jaqsy tanys bolǵan. Tergeý málimetterine qaraǵanda, jarylystan 3 kún ótkennen keıin Qadyrbaev pen Tájaıaqov pırotehnıka men noýtbýk bolǵan Tsarnaevtyń rıýkzagynyń kózin joımaq bolǵan.
Jańalyqtardan Tsarnaevtyń sýretin kórgen olar jarylysqa onyń qatysy bar eken dep oılap, osyndaı áreketke bardy degen boljam bar. Rıýkzak qoqys tastaıtyn jerden tabyldy.
Eger Qadyrbaev pen Tájaıaqov kináli dep tanylsa, onda olar 25 jylǵa deıin bas bostandyǵynan aıyrylýy múmkin. Tsarnaevtyń úshinshi dosy amerıkandyq Robel Fıllıpos FBR tergeýshilerine jalǵan málimdeme berdi dep aıyptalýda. Ol 16 jylǵa deıin bas bostandyǵynan aıyrylýy múmkin. Úsheýi de kinásiz ekenderin alǵa tartýda.
