Dıana Táshimbetova «Álem arýy Qazaqstan-2022» ataǵynan aıyryldy
ASTANA. QazAqparat – «Qazaqstan arýy» ulttyq sulýlyq baıqaýynyń uıymdastyrý komıteti Dıana Táshimbetovany «Álem arýy Qazaqstan-2022» ataǵynan aıyrdy. Bul týraly uıymdastyrý komıtetiniń resmı málimdemesinde aıtylǵan, dep habarlaıdy QazAqparat.
«Konkýrs pen onyń qatysýshylaryna jala jabylyp, ataǵyna syzat túsirgen posttar men tikeleı efırdi jarııalaýyna baılanysty bıylǵy «Álem arýy Qazaqstan-2022» jeńimpazy Dıana Táshimbetovany ataǵynan aıyramyz.
Dıananyń sózi tek uıymdastyrý komıtetiniń músheleri men onyń seriktesterin emes, sonymen qatar, baıqaýdyń basqa qatysýshylaryn da negizsiz qaralap otyr. Biz buny basqalarǵa degen úlken qurmetsizdik jáne basqalardyń eńbegin baǵalamaý dep sanaımyz. Qarapaıym qyzdardyń tanymal bolýyn qamtamasyz etý úshin jumys isteı otyryp, uıymdastyrý komıteti úlken is atqaryp qana qoımaıdy, sonymen qatar, basqa músheler men seriktester aldynda tolyq jaýapkershilikti óz moınyna alady.
Fınaldyq shoýǵa, pıar-kompanııaǵa, Dıana Táshimbetovany baıqaýǵa qatysýǵa daıyndaýǵa jáne onyń ımıdjin damytýǵa orasan zor qarajat pen kúsh jumsalǵan, al onyń kórsetken qurmetsizdigi mundaı adamnyń elimizdiń namysyn qorǵaıtyn «Arý» ataǵyna laıyq emes ekenin kórsetedi.
Baıqaýdy uıymdastyrý komıteti qoldaýlaryńyzǵa alǵys bildiredi jáne baıqaýǵa qatysýshylardy bir-birin qurmetteýge, óz sózine jaýapkershilikpen qaraýǵa jáne kompanııa dırektsııasyna túsinistikpen qaraýǵa shaqyrady», - delingen habarlamada.
«Qazaqstan arýy - 2022» fınalısi Dıana Táshimbetova sulýlyq konkýrsynyń uıymdastyrýshylaryna shaǵymdanǵan.
Boıjetken óziniń áleýmettik jelidegi paraqshasynda «Qazaqstan atynan «Álem arýy» sulýlyq baıqaýyna qatyspaıtynyn, sebebi «Qazaqstan arýy» ulttyq sulýlyq baıqaýynyń uıymdastyrý komıteti tarapynan qarjylandyrý bolmaǵanyn málimdegen.
Osy shaǵymǵa baılanysty konkýrstyń uıymdastyrý komıteti beısenbi kúni resmı jaýap berdi.
«Resmı habarlaımyz:
1. AQSh-qa vıza men bıletti Dıana sulýlyq konkýrsyna qatysý úshin almaǵan, ony jeke maqsatta qyrkúıekte rásimdegen.
2. Dıana keshki kóılekterin ózi daıyndady, sebebi biz usynǵan jáne otandyq dızaınerlerdiń nusqalary Táshimbetovanyń jáne onyń otbasynyń kóńilinen shyqpady.
3. Dıana otbasymen birge AQSh-ta turý maqsatynda sol elge ketti, sol úshin biz «Álem arýy» baıqaýynda el namysyn qorǵaıtyn qatysýshy retinde odan bas tarttyq. Sebebi, basqa elde turatyn adam Qazaqstandy halyqaralyq arenada tanystyrýǵa tolyq daıyndala almaıdy», - delingen habarlamada.
Foto: instagram.com/diana.tashii
