Diamond Ring men «QazAqparat» HAA memorandýmǵa qol qoıdy
ASTANA. QazAqparat - Búgin Astanada «Diamond Ring» qazaqstandyq boks promoýterlik kompanııasy men «QazAqparat» HAA arasynda yntymaqtastyq týraly resmı kelisim jasady, dep habarlaıdy «SPORTINFORM» SAA.
«Diamond Ring» qazaqstandyq boks promoýterlik kompanııasy men «QazAqparat» HAA arasynda yntymaqtastyq týraly kelisimge qos uıymnyń basshylary Lashyn Aımaǵambetov pen Asqar Ýmarov qol qoıdy.
«Diamond Ring kompanııasynyń aqparattyq seriktesi ataný biz úshin úlken mártebe. Bastamany kótergen Lashyn Aımaǵambetovke alǵys bildirgim keledi. Bul promoýterlik kompanııa álemdik arenalarda bizdiń boksshylarymyzdyń soıylyn soǵyp keledi. Sonymen qatar, elimizdegi sportty jan-jaqty nasıhattap, jas urpaqty otansúıgishtikke tárbıeleýde. 20 jyl buryn bizdiń sportshylar AQSh-tyń tanymal rıngterinde juldyzdaı jarqyrap, olardyń shetelde jankúıerleri bolatynyn oısha elestetý qıyn bolatyn. Biz óz tarapymyzdan aqparattyq qoldaýǵa kúsh salyp, el sportshylarynyń jetistikterin nasıhattap otyratyn bolamyz. Bul - úlken seriktestiktiń bastaýy!», - dedi «QazAqparat» HAA bas dırektory Asqar Ýmarov. 
«Diamond Ring» boks promoýterlik kompanııasy Qazaqstanda bes jylǵa jýyq ýaqyttan beri jumys istep keledi. Kompanııanyń atynan shyǵyp júrgen úzdikter qatarynda ekinshi jartylaı jeńil salmaqta óner kórsetetin Bekman Soılybaev (12-0, 4 KO) jáne Aıdar Sháribaev (7-0, 6 KO) bar.
«Bizdiń usynysymyzǵa qoldaý bildirgen «QazAqparat» HAA-ǵa alǵys aıtqymyz keledi. Osyndaı úlken qurmetke ıe aqparattyq alań arqyly jaqsy sporttyq jańalyqtar taratýǵa bizdiń kompanııa bar kúshin salady. Onyń biri 12 sáýirde AQSh-ta ótetin Aıdar Sháribaevtiń jekpe-jegi. Onyń qarsylasy Álemdik boks qaýymdastyǵy sanktsııalaǵan sportshy Endrıý Kanchıo bolmaq. Kezdesýdi AQSh-tyń ESPN arnasy tikeleı efırde kórsetedi», - dedi Lashyn Aımaǵambetov.
