Dıametri 30 metrge deıin jetetin asteroıd 18 mamyrda Jerge jaqyndaıdy
ASTANA. KAZINFORM – Jýyrda ǵana anyqtalǵan asteroıd 18 mamyrda Jerge shamamen 90 myń shaqyrym qashyqtyqqa deıin jaqyndaıdy, dep habarlaıdy ABC News.
Ǵaryshtyq ólshemmen alǵanda bul óte jaqyn qashyqtyq bolǵanymen, ǵalymdar Jermen soqtyǵysý qaýpi joq ekenin atap ótti.
Aldyn ala málimetter boıynsha, nysan Jer men Aı araqashyqtyǵynyń shamamen tórtten bir bóligine teń qashyqtyqtan ótedi. Asteroıdty birneshe kún buryn birden birneshe observatorııanyń astronomdary baıqaǵan. Olardyń qatarynda Kanzas shtatyndaǵy Farpoınt observatorııasy men Arızonadaǵy Maýnt-Lemmon observatorııasy bar.
NASA janyndaǵy Reaktıvti qozǵalys zerthanasynyń esepteýlerine sáıkes, aspan denesiniń ólshemi 15-ten 30 metrge deıin bolýy múmkin. Qazirgi ýaqytta mamandar onyń orbıtasy men fızıkalyq sıpattamalaryn naqtylap jatyr.
Ázirge asteroıd birneshe kún ishinde nebári 24 ret qana baqylanǵandyqtan, onyń traektorııasy áli de túzetilip jatyr. Soǵan qaramastan qazirgi esepteýler Jermen soqtyǵysý qaýpi joq ekenin kórsetedi.
Nysan Jerge jaqyn «Apollon» klasyna jatatyn asteroıdtar qataryna kiredi. NASA málimetinshe, mundaı aspan deneleri Kúndi aınala qozǵalatyn Jer orbıtasymen qıylysatyn orbıta boıymen qozǵalady.
Buǵan deıin AQSh pen Eýropanyń ǵarysh agenttikteri 2032 jyly Jermen soqtyǵysýy múmkin asteroıdty baqylap otyrǵany habarlanǵan edi.
Aıta keteıik, byltyr qyrkúıekte Chelıabi meteorıtinen 1000 ese aýyr iri asteroıdtiń Jerge jaqyndap kele jatqanyn jazdyq.
Al NASA Aıǵa qaýip tóndiretin asteroıdqa ıadrolyq soqqy bermekshi.
