Dıagnozy bar balalarǵa bólek bap qarastyrylmaǵan — zańger Almatydaǵy oqıǵa týraly

ASTANA. KAZINFORM — Zańger Nurgúl Málik Almatyda aýtıst jasóspirimniń 2 jasar balany jaraqattaý oqıǵasyna qatysty pikir bildirdi.

Onyń aıtýynsha, zańymyzda dıagnozy bar balalarǵa bólek bap qarastyrylmaǵan.

— Almatydaǵy jaǵdaıǵa kelsek, ony jasaǵan 13 jastaǵy balanyń psıhıkalyq aýytqýy bar. Bizdiń zańnamaǵa saı qylmystyq jaýapkershilikke tek 14 jastan bastap tartylady. Alaıda quzyrly organdar óz tarapynan qylmystyq is qozǵady. Meniń paıymdaýymsha, Qylmystyq kodekstiń 107-babynda kámeletke tolmaǵan tulǵa densaýlyqqa nuqsan keltirse, sol kezde ǵana jaýapqa tartylady, — dedi ol «Jibek joly» telearnasyndaǵy «Búgin LIVE» baǵdarlamasynda.

Sondaı-aq ol bul iske qatysty qandaı jaza taǵaıyndalýy múmkin ekenin atap ótti.

— Joǵaryda aıtqandaı, jasóspirim áli kámeletke tolmaǵan. Sondyqtan bul jerde ata-analar jaýapqa tartylýy múmkin. Naqtyraq aıtqanda, QR Ákimshilik kodeksine saı aıyppul salynýy yqtımal, sebebi zańda dıagnozy bar balalarǵa arnalǵan naqty norma joq, — dedi zańger.

Eske salsaq, Almatyda jasóspirim 2 jasar balany kóterip, jerge laqtyryp jibergen.

Keıin Almaty boıynsha bala quqyqtary jónindegi ýákil Dıana Erlan Áýezov aýdanynda bolǵan oqıǵaǵa qatysty málimdeme jasady.