Dıabettiń saldarynan árbir 20 sekýnd saıyn bir adam ampýtatsııaǵa ushyraıdy
ASTANA. QazAqparat - Búginde qant dıabetin ýaqytynda anyqtaý sharalary durys júrgizilmeıdi. Oǵan qosa, osy aýrýǵa shaldyqqandar der kezinde medıtsınalyq kómekke júginbeıdi. Sonyń saldarynan álem boıynsha árbir 20 sekýnd saıyn bir adamnyń dene múshesi ampýtatsııalanady, dep xabarlaıdy QazAqparat tilshisi.
«Qant dıabetiniń epıdemııasy ýshyǵyp tur. Búginde álem boıynsha 2-3 mlrd adamnyń artyq salmaǵy bar. Eýropanyń ózinde xalyqtyń jartysynan kóbi artyq salmaq jınaǵan. Sonyń saldarynan qant dıabetine shaldyqqandar barshylyq. Sosyn qazir taǵy úlken bir problema bar. Balalardyń arasynda semizdik keńinen taralyp keledi. Sebebi olar qunary kóp tamaq jeıdi, biraq az qozǵalady», - dedi Zagreb ýnıversıetiniń ǵalymy Darıo Raxelık búgin Astanada qant dıabetine arnalǵan xalyqaralyq konferentsııada.
Mamannyń aıtýynsha, qant dıabetine shaldyqqandardyń kóbisi osy dertpen aýyryp júrgenin bilmeı júredi. Dárigerge barýǵa da asyqpaıdy. Al aýrý asqynǵan kezde ampýtatsııadan basqa amal qalmaıdy. «Sondyqtan osy máselege asa saq bolý qajet. Ásirese, bir jerde otyryp, jumys isteıtin adamdardyń óz densaýlyǵyna uqypty bolǵan jón. Salaýatty ómir salty men skrınıgti umytpaý kerek», - dep atap kórsetti Raxelık.
Aıta keteıik, Qazaqstanda atalǵan problema óte ózekti bolyp tur. Sebebi sońǵy on jyldyń ishinde dıabet aýrýyna shaldyqqan adamdardyń sany eki esege ósti. Olardyń basym bóligi ekinshi tıptegi dıabetke shaldyqqan .
