Dıabetpen aýyratyndarǵa test-jolaqtardy otandyq óndirýshi jetkizetin boldy
ASTANA. QazAqparat - 2018 jyldyń alǵashqy úsh aıyna, ıaǵnı 90 kúndik qajettilikti qamtamasyz etý úshin otandyq óndirýshiden 650 mln teńge somaǵa qandaǵy qant deńgeıin anyqtaýǵa múmkindik beretin 300 myńnan artyq test-jolaqtary, sondaı-aq qant dıabetimen aýyratyn patsıetterge glıýkometrlar satyp alyndy, dep habarlaıdy QazAqparat.
«Biryńǵaı dıstrıbıýtordyń tender qorytyndysy boıynsha jyldyń qalǵan aılaryna 1,1 mlrd teńgeden astam somaǵa taǵy 570 myń test-jolaqtar satyp alynady. Qazirgi kezde test-jolaqtary jáne glıýkometrlerdi shyǵarýdy ári jetkizýdi otandyq óndirýshi «Aksel jáne A» júzege asyrady. 2015 jyly 7 jyl merzimge jasalǵan uzaq merzimdi shart aıasynda memleket bul óndirýshiden glıýkometrlar men test-jolaqtaryn satyp alady, sondaı-aq otandyq jetkizýshi satyp alý rásimine qatysa otyryp, biryńǵaı dıstrıbıýtordyń tenderleriniń nátıjesinde absolıýtti artyqshylyqtarǵa ıe bolady. Tenderge qazaqstandyq zaýyt qatysyp otyrǵanda basqa qatysýshylar qarastyrylmaıdy», - dep atap ótilgen QR DSM habarlamasynda.
Aıtpaqshy, 2017 jyly qazaqstandyqtar otandyq óndirýshiniń test-jolaqtary jáne glıýkometrlarymen 1,16 mlrd teńgege qamtamasyz etildi. Bul zattar tegin medıtsınalyq kómektiń kepildik berilgen kólemi aıasynda dıspanserlik tizimde turǵan qant dıabetimen aýyrǵandarǵa berildi.
