Dıabetke qarsy dári-dármek pen medıtsınalyq buıym alǵan naýqastar sany 79 myńǵa artty

ASTANA. KAZINFORM – Qazaqstanda qant dıabetimen aýyratyn naýqastardy dári-dármekpen jáne medıtsınalyq buıym alǵan naýqastar sany artqan. 

Dıabetke qarsy dári-dármek pen medıtsınalyq buıym alǵan naýqastar sany 79 myńǵa artty
Foto: Kazinform/JI

Bul týraly Kazinform agenttiginiń resmı saýalyna jaýap bergen Densaýlyq saqtaý mınıstrligi málimdedi.

Vedomstvo dereginshe, 2022 jyly ambýlatorııalyq dári-dármekpen qamtamasyz etý aıasynda 382 579 adam dárilik zattar men medıtsınalyq buıym alǵan. 

2023 jyly olardyń sany 414 200-ge, 2024 jyly 440 932-ge, al 2025 jyly 461 815-ke jetken. Osylaısha, 2022 jylmen salystyrǵanda 2025 jyly dári-dármek pen medıtsınalyq buıym alǵan naýqastar sany 79 236 adamǵa nemese 20,7 paıyzǵa artqan.

Bul kezeńde jazylǵan retseptter sany da ósken. 2022 jyly 2 773 744 retsept rásimdelse, 2023 jyly 3 242 820, 2024 jyly 3 425 462, al 2025 jyly 3 566 356 retsept jazylǵan.

Densaýlyq saqtaý mınıstrliginiń habarlaýynsha, dári-dármekpen qamtamasyz etýge qatysty suraqtar boıynsha azamattar «SK-Farmatsııa» JShS-niń 1439 baılanys ortalyǵyna habarlasyp, aqparat ala alady nemese ótinish qaldyra alady.

Eske salaıyq, buǵan deıin Qazaqstanda qant dıabetimen aýyratyn naýqastar arasyndaǵy aıaq ampýtatsııasy men ólim kórsetkishi tómendegenin jazǵanbyz.