Dıabetke baılanysty aıaq ampýtatsııasy men ólim kórsetkishi tómendedi

ASTANA. KAZINFORM – Qazaqstanda qant dıabetimen aýyratyn naýqastar arasyndaǵy aıaq ampýtatsııasy men ólim kórsetkishi tómendegen. Bul týraly Kazinform agenttiginiń resmı saýalyna jaýap bergen Densaýlyq saqtaý mınıstrligi habarlady.

dıabet
Foto: Pexels

Vedomstvo málimetinshe, qant dıabetimen aýyratyn naýqastar arasyndaǵy aıaq ampýtatsııasynyń salystyrmaly kórsetkishi 2021 jylǵy 0,28 paıyzdan 2024 jyly 0,24 paıyzǵa deıin azaıǵan.

— Eýropa elderinde dıabetpen aýyratyn naýqastar arasyndaǵy ampýtatsııanyń ortasha jıiligi — jylyna shamamen 0,29 paıyz. Al AQSh-ta 2021 jyly bul kórsetkish 0,68 paıyz bolǵan, — delingen jaýapta.

Sonymen qatar elimizde qant dıabetimen aýyratyn naýqastar arasyndaǵy ólim kórsetkishi de azaıǵan. Dıspanserlik naýqastardyń elektrondyq tirkelimine sáıkes, 2021 jyly 100 myń turǵynǵa shaqqanda 35,5 ólim jaǵdaıy tirkelgen. 2022 jyly bul kórsetkish 22-ge, 2023 jyly 21,12-ge deıin tómendegen. Al 2024 jyly 21,54 bolǵan.

Mınıstrliktiń málimetinshe, keıingi kórsetkish pandemııaǵa deıingi deńgeıden de tómen. Atap aıtqanda, 2018–2019 jyldary qant dıabetimen aýyratyndar arasyndaǵy ólim kórsetkishi 100 myń turǵynǵa shaqqanda 27–27,7 bolǵan.

Eske salaıyq, munyń aldynda Qazaqstanda jarty mıllıonnan astam adam qant dıabeti dıagnozymen esepte turǵanyn jazǵan edik.