Dı Kaprıo rejısser Martın Skorsezeniń fılmine túsedi
ASTANA. QazAqparat - Gollıvýdtiń tanymal akteri Leonardo Dı Kaprıo rejısser Martın Skorsezeniń fılmine túsýge kelisim berdi. Bul týraly www.24.kz Variety basylymyna silteme jasap habarlaıdy.
Kartına amerıkalyq jýrnalıst Erık Larsonnyń «Aq qaladaǵy albasty...» atty derekti romanyna negizdelgen. 2003 jyly jaryq kórgen bul kitap ómirde bolǵan oqıǵaǵa negizdelgen. Ádebıette Chıkagoda 1893 jyly ótken Dúnıejúzilik kórme men 200-ge jýyq adamnyń ómirin qıǵan qaskúnem Genrı Holms jaıly baıandalady. Holms sol kórme ótken ǵımarat mańyndaǵy qonaqúıdi óziniń aram nıetterin iske asyrý úshin paıdalanǵan. Kezinde roman 11 ádebı júldeni jeńip aldy.
Romannyń ekrandalǵan túri ázirge shartty túrde «Aq qaladaǵy albasty» dep atalady. Jýyq arada týyndyny túsirý kestesi men onyń prokatqa shyǵý ýaqyty qosymsha jarııalanady, dep habarlaıdy TASS.
