Dezınfektsııalaý kezinde turǵyndar podezge shyqpaýy kerek – elorda ákimi
NUR-SULTAN. QazAqparat – Nur-Sultan qalasynyń ákimi Altaı Kólginovtiń aıtýynsha, búginge deıin elordada 1900 podezde dezınfektsııalaý jumysy júrgizilgen, dep habarlaıdy QazAqparat tilshisi.
«Qaladaǵy dezınfektsııa aıtarlyqtaı kúrdeli jumys. Bul iske Qarýly kúshterdiń áskerıleri de aralasty. Dál qazirgi ýaqytta qalany dezınfektsııalaý jumysyna 475 adam atsalysýda. Jartysy – áskerıler. Qalǵany bizdiń mamandar men dezınfektsııamen aınalysatyn arnaıy kompanııanyń ókilderi. Eń birinshi kezekte biz ınfektsııa oshaqtaryn óńdeımiz. Máselen qazirgi tańda shaharda 10 uıym karantıge jabylǵan. Onyń ishinde №1 avtobýs parki de baryn bilesizder. Sonymen qatar karantınge jabylǵan nysandardyń ishinde jataqhanalar, eki medıtsınalyq uıym bar. Biz eń birinshi kezekte koronavırýs anyqtalǵan adamnyń úıindegi podezdi tazaladyq», - dedi Altaı Kólginov Tengrınıýs.kz portalyna bergen tikeleı efırdegi suhbatynda.
Qala basshysy, sonymen qatar, dezınfektsııalaý jumysy aıaldamalarda, jaıaý júrginshiler jolynda júrgizilip jatqanyn aıtyp ótti.
«Qazir biz negizinen podezderge basa mańyz berip otyrmyz. Ne úshin bul kúrdeli jumys dep aıtyp otyrmyn. Máselen dezınfektsııalaýshy bir adamnyń arqasynda 10 kelilik júkpen kúni boıy jumys isteıdi. Búgin tańerteńge deıin biz 1900 podezdi dezınfektsııaladyq. Bul – 500-ge tarta úı», - dedi ol.
Onyń aıtýynsha kóshe men aýlada adam qanshalyq az bolsa, koronavırýstyń taralý qaýpi sonshalyqty tómen.
«Bul preparattar adamdardyń ómirine qaýipti bolsa, paıdalanbas edik. Biraq bul preparat – antıvırýs. Sol sebepti ol shashylyp jatqan kezde aýlaq bolý kerek. Jalpy, qaýipsiz degenimizben quramynda hlor bar. Bul máselege de barlyq qaýipsizdik normasyn saqtaı otyryp qaraý kerek. Sol sebepti podezderdi óńdeý kezinde qala turǵyndaryna shyqpaýdy suraımyz», - dedi ol.
