Devıs kýbogy: Ulybrıtanııa quramasy Nıderlandy tennısshilerin utty
NUR-SULTAN. QazAqparat – Madrıdte ótip jatqan Devıs kýbogy fınalynda Ulybrıtanııa quramasy Nıderlandy ókilderin utty, dep habarlaıdy QazAqparat tilshisi.
Qazaqstanmen bir toptaǵy qos quramanyń matchy asa tartysty boldy.
Alǵashqy bolyp kortqa ulybrıtanııalyq ataqty tennısshi Endı Marreı men nıderlandylyq Tallon Grıkspýr shyqty.
Úsh saǵatqa jýyq ýaqytqa sozylǵan kezdesýde E.Marreı qarsylasyn 6:7 (7:9), 6:4, 7:6 (7:5) esebimen tize búktirdi.
Esesine Nıderlandynyń birinshi raketkasy Robın Hase Denıel Evansty 3:6, 7:6 (7:5), 6:4 esebimen jeńgennen keıin tarazy basy teńesti – 1:1.
Juptyq básekede Ulybrıtanııadan Djeımı Marreı men Nıl Skýpskı Nıderlandydan Ýes Kolhof pen Jan-Jıýlen Roıer synǵa tústi.
Birinshi partııada Marreı men Skýpskı juby basymdyq tanytty – 6:4. Ekinshi set taı-breıkke deıin jetkenimen, onda da ulybrıtanııalyqtardyń asyǵy alshysynan tústi – 7:6 (8:6).
Osylaısha Ulybrıtanııa Nıderlandy tennısshilerin 2:1 esebimen utty. Qazaqstandyqtar da bastapqy básekesinde nıderlandylyqtardan dál osyndaı eseppen basym túsken bolatyn.
Búgin Qazaqstan quramasy Ulybrıtanııamen sheshýshi matchyn ótkizedi.
Madrıdte Devıs kýbogy alǵash ret ózgeshe sıpatta ótýde, ıaǵnı 18 úzdik komanda alty topqa bólingen. Osydan ozyq shyqqan alty qurama shırek fınalǵa joldama alady. Oǵan ekinshi oryn alǵandar ishinen taǵy eki komanda qosylady. Sondyqtan quramalardyń qarsylastaryn qandaı eseppen utqany da mańyzdy.
Eske sala keteıik, budan buryn Qazaqstan Nıderlandy quramasyn jeńgenin jazǵan bolatynbyz.
