Devıs kýbogy: Ulybrıtanııa Qazaqstanmen matchta alǵa shyqty
NUR-SULTAN. QazAqparat – Madrıdte Devıs kýbogy fınaly aıasynda Qazaqstan – Ulybrıtanııa matchy ótip jatyr, dep habarlaıdy QazAqparat tilshisi.
Alǵashqy bolyp Qazaqstannan Mıhaıl Kýkýshkın, Ulybrıtanııadan Kaıl Edmýnd kortqa shyqty.
Dúnıejúzilik reıtıngte M.Kýkýshkın 67-orynda bolsa, qarsylasy odan eki saty tómen edi. Degenmen kimniń sheberligi artyq ekendigi oıyn ústinde kórinetini belgili.
Birinshi partııada shıraq oınaǵan K.Edmýnd 6:3 esebimen basym tústi.
Ekinshi sette esep 2:2 bolǵan mezette ulybrıtanııalyq tennısshi breık jasap, alǵa ketti. Ol taǵy bir breıkpen matchty támamdady – 6:3.
Báseke 1 saǵat 15 mınýtqa sozyldy.
Osylaısha ulybrıtanııalyqtar 1:0 esebimen alǵa shyqty.
Budan keıin Qazaqstannyń birinshi, álemniń 57-raketkasy Aleksandr Býblık pen reıtıngte 42-oryndaǵy Denıel Evans sheberlik baıqasady.
Juptyq kezdesýde Andreı Golýbev pen Aleksandr Nedovesov Djeımı Marreı men Nıl Skýpskımen synǵa túsedi dep josparlanǵan, degenmen matchtyń ótý barysyna qaraı oǵan ózgeris engizilýi múmkin.
Qos quramanyń qaı jeńgeni pleı-off básekesine joldama alady.
Eske sala keteıik, budan buryn Ulybrıtanııa quramasynyń Nıderlandy tennısshilerin jeńgenin jazǵan bolatynbyz.
