Devıs kýbogy: Rodjer Federer Qazaqstanǵa kele almaıdy
ASTANA. QazAqparat - Tennısten Qazaqstan quramasynyń kapıtany Dıas Dosqaraev otandyq sportshylardyń 2-4 aqpan kúnderi Astanada Shveıtsarııaǵa qarsy ótetin Devıs Kýbogynyń 1/8 fınalyna daıyndyǵy jóninde aıtyp berdi, dep habarlaıdy QazAqparat tilshisi.
Qurama qapıtanynyń aıtýynsha, Qazaqstan men Shveıtsarııa arasyndaǵy 1/8 fınalda Qazaqstan favorıt atanyp otyr.
«Qazaqstan men Shveıtsarııa arasyndaǵy shırek fınal úshin tartysta favorıt atanyp otyrmyz. Sebebi, Shveıtsarııanyń ańyzǵa aınalǵan tennısshileri - Rodjer Federer men Sten Vavrınka bul matchqa kele almaıdy. Onyń ústine óz alańymyzda oınaý da tennısshilerge oń yqpalyn tıgizedi. Álemdik reıtıngte shveıtsarııalyq tennısshiler bizdiń komanda kóshbasshylarynan tómen ornalasqan. Tamasha múmkindik bolǵaly tur. Áıtse de, álemdik Devıs kýbogynda álsizder bolmaıdy, onda reıtıng eshqandaı ról oınamaıdy. Sondyqtan, bizdi tartysty oıyn kútip tur. Bizge esh bosańsýǵa bolmaıdy, oıynǵa bar kúshimizdi salýymyz kerek», - dedi komanda kapıtany Dıas Dosqaraev Astanadaǵy Ulttyq tennıs ortalyǵynda ótken baspasóz máslıhatynda.
Sondaı-aq, D.Dosqaraev tennısshileriniń oıynǵa tas-túıin daıyn ekendigin jetkizdi.
«Jigitter óte tájirıbeli jáne ulttyq quramanyń formasyn kııýdiń qandaı jaýapkershilik júkteıtinin túsinedi. Olar eki apta buryn Astanaǵa ushyp keldi jáne aýa raıy men ýaqyt aıyrmashylyǵyna boı úıretti. Qazirgi ýaqytta úzdiksiz jattyǵý jumystarymen aınalysýda», - dep óz sózin tolyqtyrdy ol.
Buǵan deıin habarlaǵanymyzdaı, Devıs kýbogy 2-4 aqpan kúnderi aralyǵynda Astanadaǵy Ulttyq tennıs ortalyǵynda ótedi. Jarys 2 aqpan kúni saǵat Astana ýaqytymen 12:00-de, 3 jáne 4 aqpan kúnderi 14:00-de bastalady.
24 qańtar kúni Qazaqstan quramasynyń Devıs kýbogy aıasynda Shveıtsarııaǵa qarsy oınaıtyn tennısshileri anyqtaldy. Atalǵan dodada Mıhaıl Kýkýshkın (ATP reıtınginde 69-oryn), Aleksandr Nedovesov (234) Dmıtrıı Popko (248), Tımýr Habıbýlın (783) jáne debıýtant Roman Hasanovty (711) baq synaıdy.
Shveıtsarııa quramasy atynan Genrı Laaksonen, Adrıan Bodmer, Mark Andrea Hýsler, Antýan Beler jáne Lýka Margarolı qarsylas bolmaq.
Eske sala ketsek, Qazaqstan Devıs kýbogyna 1995 jyldan beri qatysyp keledi. Ulttyq quramamyz 2010 jyly birinshi ret Álemdik topqa ilikken bolatyn. Al 2011, 2013, 2014 jáne 2015 jyldary jarystyń shırek fınalyna shyqty.
