Devıs kýbogy: Qazaqstandyqtardyń alǵashqy qarsylasy kimder
ASTANA. QazAqparat - Tennısten Qazaqstan quramasynyń Devıs kýbogyndaǵy qarsylasy anyqtaldy, dep habarlaıdy QazAqparat tilshisi.
QR Ulttyq Olımpıadalyq komıtetiniń baspasóz qyzmetiniń habarlaýynsha, Londonda ótken jerebe nátıjesi boıynsha, 2019 jylǵy Devıs kýbogynyń birinshi kezdesýinde Qazaqstan Portýgalııaǵa qarsy oınaıdy.
Bes matchqa sozylatyn kezdesý 1-2 aqpan kúnderi Astanada ótedi.
Eske sala keteıik, bıylǵy Devıs kýbogynda Qazaqstan Shveıtsarııa quramasyn 4:1 esebimen utyp, syrt alańda Horvatııaǵa 1:3 esebimen jol berdi.
Devıs kýbogy - 1900 jyldan beri tennısten erler arasynda ótkiziletin iri halyqaralyq týrnır. 1979 jyldan beri Halyqaralyq tennıs federatsııasynyń qoldaýymen ótkiziledi.
