Devıs kýbogy: Qazaqstan - shırek fınalda
ASTANA. QazAqparat - Elordanyń «Dáýlet» respýblıkalyq tennıs ortalyǵynda Devıs kýbogynyń alǵashqy aınalymy ótti. Álemdik topta ornalasqan bizdiń qurama Belgııa tennısshilerimen baq synasty.
Úsh kún boıy ótken 5 match Astananyń tennıs jankúıerlerin bir qýantsa kerek. Alǵashqy kúni Qazaqstannyń birinshi raketkasy Mıhaıl Kýkýshkın Rýben Bemelmansqa qarsy oınady. Oıyn bastalysymen Mısha óziniń tájirıbesi mol tennısshi ekendigin baıqatty. Bul kezdesýde Kýkýshkın 6-4, 6-7, 6-2, 6-3 esebimen jeńiske jetti.
Jankúıerlerdiń asyǵa kútkeni árıne, qazaqstandyq Andreı Golýbev pen Belgııanyń jas talanty Davıd Goffen arasyndaǵy match boldy. Kezdesý bastalyp ta ketti. Tartysty oıyn bolatyny alǵashqy upaı kezderinde-aq bilindi. Eki sportshy da árbir geım men setti op-ońaı jeńile qoıǵysy kelmedi. Qazaq jankúıerleriniń qoldaýy da sezilip otyr. Onymen qatar osy matchtyń basynda Elbasy Nursultan Ábishuly Nazarbaev ta Qazaqstan quramasyn qoldaýǵa keldi. Lyq toly «Dáýlet» sport kesheninde qazaqstandyq Andreı Golýbev úlken synaqqa tap bolǵandaı.
4 setten keıin esep 2-2 bolyp turdy. Sońǵy set. Belgııalyq Davıd ta, Andreı de jeńiske bir taban jaqyn bolyp edi. Alaıda sheshýshi sátterde táýekelge bas uryp, salqynqandy oıyn órnegin kórsetken jerlesimiz jeńisti belgııalyq tennısshiniń aýzynan jyryp aldy. Úlken jeńis. Esep: 7-6(9), 3-6, 4-6, 6-2, 12-10.
Qazaqstandyqtar úshin alǵashqy kún jeńispen aıaqtalsa, ekinshi kúni juptyq básekede belgııalyqtar basym boldy. Quramalar arasynda jalpy esep - 2-1-ge jetip, sheshýshi kezdesýlerdi kútý ǵana qaldy.
Sońǵy jarys kúninde qazaqstandyqtar úshin jeńis aýadaı qajet edi. Kýkýshkın Goffenmen tartysqa shyqty. Sheshýshi 5-shi set te bolatyn boldy. Golýbevke ese jiberip qoıǵan Goffen qaharyna qaıta túsken aıazdaı jeńisti ǵana kózdese kerek. Degenine jetti. «Mısha, Mısha» dep qoldaý kórsetken jankúıerlerimiz aldynda Mıhaıl Kýkýshkın jeńilip qaldy. Biraq juptyq kezdesýge Kýkýshkın Evseevtyń ornyna alańǵa shyqqanyn aıtpasa bolmas. Qatarynan úsh kún oınaǵan Mıhaıldyń sharshap qalǵany bolsa kerek. Kezdesý esebi 6-4, 3-6, 6-3, 4-6, 0-6.
Jalpy esepte tarazy basy teńeldi. 2-2. Kelesi bolyp kortqa Andreı Golýbev Rýben Bemelmansqa qarsy turdy. Andreı bir izdiń boıyna túsip alyp, sol izden aýytqymaı jeńiske senimdi túrde jetti. Esep 6-2, 6-3, 6-1. Bul jeńispen Qazaqstan quramasy jalpy esep 3-2 bolyp, basym tústi.
Devıs kýbogynyń kezekti týrynda qazaqstandyq tennısshiler Shveıtsarııa quramasyna qarsy turady. Al Shveıtsarııa quramasyn Federer, Vavrınka...Endeshe tennısshilerimizdi abyroıly synaq kútip tur.
