Devıs kýbogy: Qazaqstan – Nıderlandy matchynda tarazy basy teńesti
NUR-SULTAN. QazAqparat – Madrıdte ótip jatqan Devıs kýbogy fınalynda qazaqstandyq Aleksandr Býblık pen Nıderlandy ókili Robın Hase kúsh synasty, dep habarlaıdy QazAqparat tilshisi.
Bul Qazaqstan – Nıderlandy matchynyń ekinshi kezdesýi edi.
Qazaqstannyń birinshi raketkasy Aleksandr Býblık álemdik reıtıngide 57-orynda bolsa, qarsylasy 163-satyda edi. Biraq A.Býblıkten týra on jas úlkendigi bar, 32 jastaǵy R.Haseniń tájirıbesi mol bolatyn.
Tartysty órbigen birinshi partııada nıderlandylyq tennısshi breık jasap, 6:5 esebimen alǵa shyǵyp, óz geımin de aldy – 7:5.
Esesine ekinshi sette esep 2:1 bolǵan mezette qazaqstandyq sportshy breık jasaı aldy. Setke dop bergende, A.Býblık qarsylasynyń mysyn basa bildi – 6:3.
Úshinshi, sheshýshi partııada esep 5:4 bolyp, A.Býblık dop bergen kezde R.Hase matchbolyn paıdalana almady. Esep 5:5 bolǵanda, qazaqstandyq tennısshi breık-poıntyn múlt jiberdi. Aqyry kezdesý taǵdyry taı-breıkte sheshilip, onda R.Hasenge sáttilik joldas boldy – 7:6 (7:5).
Tartysty báseke 2 saǵat 13 mınýtqa sozyldy.
Endi match jeńimpazy juptyq básekede sheshiledi. Eshqandaı ózgeris oryn almasa, Andreı Golýbev pen Aleksandr Nedovesov Ýes Kolhof pen Jan-Jıýlen Roıermen synǵa túsedi.
Bıyl Devıs kýbogynyń fınaly alǵash ret ózgeshe sıpatta ótýde, ıaǵnı ár toptan úzdik shyqqandar pleı-off básekesine joldama alady.
Eske sala keteıik, budan buryn Qazaqstan – Nıderlandy matchyn Mıhaıl Kýkýshkınniń jeńispen bastaǵanyn jazǵan bolatynbyz.
