Devıs kýbogy: Qazaqstan men Portýgalııa juptyq synda básekege túsedi
ASTANA. QazAqparat - Astanadaǵy Ulttyq tennıs ortalyǵynda Devıs kýbogy álemdik tobynyń irikteý kezeńinde Qazaqstan men Portýgalııa quramalary senbi kúni juptyq kezdesýin ótkizedi, dep habarlaıdy QazAqparat tilshisi.
Aleksandr Nedovesov pen Tımýr Habıbýllın juby Joaý Soýza men Gastao Elıaspen kúsh synasady. Eger osy básekede qazaqstandyq tennısshiler jeńiske jetse, onda Qazaqstan quramasy Ispanııa astanasy Madrıdte 18-24 qarashada ótetin Devıs kýbogy álemdik týrnıriniń fınaldyq kezeńine joldama alady. Al portýgalııalyq jup utsa, onda esep qysqaryp, tórtinshi básekede Mıhaıl Kýkýshkın Joaý Soýzamen kortqa shyǵady. Budan keıin tarazy basy teńesse, Aleksandr Býblık Pedro Soýzamen sheshýshi kezdesýdi ótkizedi.
Qazaqstan quramasy juma kúngi básekelerdi óte sátti aıaqtady. Aldymen dúnıejúzilik reıtıngte 171-orynda turǵan 21 jasar Aleksandr Býblık Portýgalııanyń birinshi, álemniń 39-raketkasy Joaý Soýzany tartysty oıynda uta bildi.
Sodan keıin Qazaqstannyń birinshi, álemniń 55-raketkasy Mıhaıl Kýkýshkın reıtıngte 101-satydaǵy Pedro Soýzany bet qaratpaı, 6:2, 6:0 esebimen tize búktirdi.
Osylaısha alǵashqy kúni Qazaqstan quramasy 2:0 esebimen alǵa shyqqan edi. Endi jalpy jeńis úshin bir-aq básekeni utý kerek.
Eske sala keteıik,budan buryn Aleksandr Býblıktiń Qazaqstan quramasyn alǵa shyǵarǵanyn jazǵan bolatynbyz.
