Devıs kýbogy: Qazaqstan quramasy juptyq synda ese jiberdi
ASTANA. QazAqparat - Astanadaǵy Ulttyq tennıs ortalyǵynda Devıs kýbogy álemdik tobynyń irikteý kezeńinde Qazaqstan men Portýgalııa matchy búgin jalǵasyn tapty, dep habarlaıdy QazAqparat tilshisi.
Juptyq synda Aleksandr Nedovesov pen Tımýr Habıbýllın Joaý Soýza jáne Gastao Elıaspen kortqa shyqty.
Bul kezdesý qos qurama úshin de mańyzdy edi. Óıtkeni jeńimpaz ataný úshin úsh utys kerek. Keshe 2:0 esebimen alǵa shyqqan qazaqstandyqtar (qurama kapıtany Dıas Dosqaraev) jeńiske jetetin bolsa, qalǵan oıyndardyń nátıjesine qaramastan, Devıs kýbogynyń fınaldyq kezeńine joldama alatyn edi. Al portýgaldyqtar úshin áýeli esepti qysqartý, sosyn teńestirip baryp, sońǵy, besinshi básekede qarsylasyn tize búktirý kerek-ti.
Birinshi partııada esep 3:2 bolǵan mezette qazaqstandyq jup breık jasaı bildi. Osy basymdylyǵynan aıyrylmaı, setti 6:3 esebimen aıaqtady.
Ekinshi sette esep 2:1 bolǵan sátte portýgaldyqtar breık jasap, alǵa shyqty - 3:1. Budan keıin qarsylastary dop bergende, qazaqstandyqtar breık-poıntty paıdalana almady - 1:4. Portýgaldyq jup birinshi partııadaǵy eseppen qarymta qaıtardy - 6:3.
Úshinshi, sheshýshi partııada Aleksandr Nedovesov alǵashqy bolyp dop bergende, qazaqstandyq jup qarsylastarynyń qos birdeı breık-poıntty paıdalanyp ketýine múmkindik bergen joq - 1:0. 23 jasar Tımýr Habıbýllın óz kezeginde dopty jaqsy bere bildi - 2:1. Dopty kúshti ári dál berýdiń mańyzy zor. Mysaly, osy sette A.Nedovesov eki márte eıs jasaı aldy. Jetinshi geımde T.Habıbýllın dop bergende, portýgaldyq jup breık jasap ketti - 4:3. Aqyry olar esesin jibergen joq - 6:4.
Osylaısha Portýgalııa esepti qysqartty - 1:2.
Endi jekeleı synda Mıhaıl Kýkýshkın Joaý Soýzamen (kesheden beri eki kezdesý ótkizgen ony basqa oıynshymen almastyrmasa) kúsh synasady. Bul ekeýi de - óz elderiniń birinshi raketkalary, M.Kýkýshkın álemdik reıtıngte 55-orynda, qarsylasy 39-satyda tur. Eger munda portýgaldyq tennısshi jeńiske jetetin bolsa, onda tarazy basy teńesip, match taǵdyryn Aleksandr Býblık pen Pedro Soýza sheshedi.
Atap ótetin jaıt, bıyldan bastap Devıs kýbogynyń erejesine birqatar ózgerister engizilgen bolatyn. ıAǵnı irikteý saıysynda kezdesýler burynǵydaı úsh kúnge sozylmaıdy, eki-aq kúnde bitirý kózdelgen. Oǵan qosa oıynshylardyń básekesi, bes emes, úsh-aq partııamen aıaqtalady. Sonymen qatar kýboktyń fınaldyq kezeńi ár elde emes, bir ǵana jerde ótedi. Bıyl qorytyndy doda Ispanııa astanasy Madrıdte 18-24 qarasha aralyǵynda bolady. Oǵan qatysatyn alty qurama qazirdiń ózinde belgili. Horvatııa, Frantsııa, Ispanııa jáne AQSh komandalary osydan burynǵy kýbok jarysynyń jartylaı fınalısteri retinde joldamaǵa ıe bolsa, Argentına men Ulybrıtanııa arnaıy shaqyrtý aldy. Qalǵan 12 komanda irikteý saıystary arqyly búgin anyqtalady.
Jańa erejege sáıkes fınaldyq kezeńde 18 qurama úsh komandadan alty topqa bólinedi. Ár komanda eki jekeleı, bir juptyq báseke ótkizedi. Top jeńimpazdary men ekinshi oryn alǵandar ishinen úzdik qos qurama pleı-off básekesine shyǵyp, jeńimpazdy anyqtaıdy.
Eske sala keteıik, budan buryn Aleksandr Býblıktiń matchty jeńispen bastaǵanyn, Qazaqstan men Portýgalııanyń juptyq synda básekege túsetinin jazǵan bolatynbyz.
