Devıs Kýbogy qarsańynda tanymal qazaqstandyq tennısshiler balalar úshin sheberlik-dárisin ótkizdi
ASTANA. 2 sáýir. QazAqparat - Astanada 2013 jyldyń 5-7 sáýirinde Devıs Kýbogy-2013: Qazaqstan-Chehııa Álemdik tobynyń shırek fınaly ótedi. Kýboktyń resmı is-sharasy dástúrli bizdiń elimizdiń tanymal tennısshileriniń balalar úshin sheberlik-dárisin ótkizýimen bastalady. Bul týraly astana.kz saıtyna qalalyq Týrızm, dene tárbıesi jáne sport basqarmasynan málim etti.
«Qazaqstan qurama komandasynyń birinshi nómirli oıynshysy Mıhaıl Kýkýshkın men Evgenıı Korolev kortta ózderiniń oıyn qupııalaryn jas tennısshilermen bólisýge yqylastana kelisti. Olar balalarǵa raketkany qalaı ustap, dopty qalaı soǵý kerektigin jan-jaqty túsindirdi. Sondaı-aq jasóspirim tennısshiler chempıondarmen shaǵyn tennıs oıynyn ótkizdi. Osy sheberlik-dáristerinen keıin M.Kýkýshkın men E.Korolev balalarǵa qoltańba berip, eskertkish sýretke tústi», - delingen habarlamada.
Eske salaıyq, osy juma kúni bizdiń sportshylar álemniń eń myqty komandalarynyń biri - Chehııa quramasymen kezdesedi. Ol Devıs Kýbogynyń qazirgi jeńimpazy bolyp tabylady. Týrnırdiń 1/4 fınaly aıasyndaǵy Qazaqstan - Chehııa matchy Astanada sáýirdiń 5-i men 7-si aralyǵynda «Dáýlet» Ulttyq tennıs ortalyǵynda ótedi. Qazaqstan quramasynda Mıhaıl Kýkýshkın men Evgenıı Korolevtan basqa ıÝrıı Şýkın men Andreı Golýbev oınaıdy.
