Devıs kýbogy: Býblıktiń jeńisinen keıin Qazaqstan quramasy alǵa shyqty
ASTANA. QazAqparat - Astanadaǵy Ulttyq tennıs ortalyǵynda Devıs kýbogy álemdik tobynyń irikteý kezeńinde Qazaqstan men Portýgalııa quramalary kezdesýde, dep habarlaıdy QazAqparat tilshisi.
Birinshi bolyp qazaqstandyq, dúnıejúzilik reıtıngte 171-orynda turǵan 21 jasar Aleksandr Býblık pen Portýgalııanyń birinshi, álemniń 39-raketkasy, bıyl 30-ǵa tolatyn Joaý Soýza kortqa shyqty.
A.Býblıktiń Qazaqstan quramasy úshin ótkizgen betashar básekesi tartysty órbip, birinshi partııa taı-breıkke ulasty. Onda portýgalııalyq tennısshi 7:1 esebimen basymdylyǵyn kórsetti.
Ekinshi partııada esep 3:3 bolyp turǵan mezette qazaqstandyq tennısshi breık jasaı bilip, óz geımin de qur jibermeı, alǵa shyqty - 5:3. Aqyry setti jeńispen aıaqtaı aldy - 6:4. Úshinshi, sheshýshi partııany da Býblık breıkpen bastady - 2:0. Sodan keıin Soýza dop bergende, breık-poınttardy paıdalana almady. Esesine óz geımin jibermedi - 3:1. Bul set te 6:4 esebimen qazaqstandyq sportshynyń paıdasyna sheshildi.
Kezdesý 2 saǵat 25 mınýtqa sozyldy.
Osylaısha Býblıktiń jeńisinen keıin Qazaqstan quramasy 1:0 esebimen alǵa shyqty.
Búgin sondaı-aq Qazaqstannyń birinshi, álemniń 55-raketkasy Mıhaıl Kýkýshkın reıtıngte 101-satydaǵy Pedro Soýzamen sheberlik baıqasady. Erteń juptyq synda Aleksandr Nedovesov pen Tımýr Habıbýllın Joaý Soýza men Gastao Elıaspen kúsh synasady. Match ár komandanyń úsh jeńisine deıin jalǵasady. Eger úsh kezdesýden keıin jeńimpaz anyqtalmasa, onda Mıhaıl Kýkýshkın Joaý Soýzamen sheberlik baıqasady. Budan keıin de teń bolsa, Aleksandr Býblık Pedro Soýzamen máseleni sheshedi.
Jeńimpaz qurama Ispanııa astanasy Madrıdte 18-24 qarashada ótetin Devıs kýbogy álemdik týrnıriniń fınaldyq kezeńine joldama alady. Onda qazirdiń ózinde AQSh, Frantsııa, Horvatııa, Ispanııa, Argentına jáne Ulybrıtanııa komandalary oınaıtyny belgili bolyp otyr.
Qazaqstannyń erler quramasy segizinshi jyl boıy álemdik tennıstiń elıtasynda óner kórsetip keledi. Sodan beri qazaqstandyqtar baıraqty básekeniń shırek fınalyna bes ret shyqty. Budan burynǵy kezeńde de olar shırek fınalǵa deıin jetip, Horvatııaǵa ese jiberdi. Keıin jarys qorytyndysynda horvattar kýbokti utyp aldy.
Eske sala keteıik, budan buryn qazaqstandyqtardyń Devıs kýbogyndaǵy qarsylastary anyqtalǵan bolatyn.
Foto: Reuters
