Devıs kýbogyna daıynbyz – Dıas Dosqaraev
ASTANA. KAZINFORM – Tennısten Qazaqstan erler quramasynyń kapıtany Dıas Dosqaraev 6-7 aqpanda Astanada Monakomen ótetin Devıs kýbogy matchyna daıyndyq týraly aıtyp berdi.
Onyń málimdeýinshe, komandada dostyq qarym-qatynas ornyqqan.
– Barlyq tennısshi de kásipqoı, sondyqtan olar alǵa qoıǵan mindetti jaqsy túsinip otyr. Biz óz alańymyzda oınaımyz, sol sebepti jankúıerler, ásirese, Aýstralııadaǵy sportshylarymyzdyń tabysynan keıin joǵary nátıje kútedi. Árıne, bul qosymsha qysym bolmaq. Degenmen jigitter muny sporttyń bir bóligi dep qaraıdy. Budan ótý úshin kúsh-qýatty durys baǵytqa jumsaı bilý kerek, - dedi Dıas Dosqaraev.
Monako quramasynyń kapıtany Gııom Kýııar qazaqstandyq komandanyń favorıt ekenin jaqsy túsinedi.
– Aýa raıy men kortqa beıimdelý úshin Astanaǵa erterek keldik. Qazaqstan quramasynyń barlyq múshesi tájirıbeli oıynshylardan jasaqtalǵan. Bizge jeńis úshin oınaý qajet. Tennısshilerim ne isteý kerektigin biledi. Qazaqstan komandasynyń barlyq oıynshymen jaqsy tanyspyz. Sondyqtan komandalyq álem chempıonatynyń kelesi kezeńine ótý úshin eń joǵary nátıjege jetýge tyrysamyz, - dedi Gııom Kýııar.
Eske sala keteıik, budan buryn Devıs kýbogynda Qazaqstan men Monako quramynda kimder oınaıtynyn jazǵan edik.
Sondaı-aq Elena Rybakına eıs sany boıynsha kósh bastady.
18 jastaǵy Ámir Omarhanov Týnıstegi týrnırde qarsylasyn kambekpen jeńdi.