Devıs kýbogy: Pákistanmen matchta Beıbit Juqaev 2:0-ge jetkizdi

ASTANA. KAZINFORM — Astana qalasynda Devıs kýbogy birinshi álemdik tobynda Qazaqstan men Pákistan arasynda ótip jatqan pleı-off matchynyń alǵashqy kúngi oıyndary aıaqtaldy.

Aleksandr Shevchenkodan keıin jeńisti joldy álemniń 230-raketkasy Beıbit Juqaev jalǵady.

Qazaqstandyq tennısshi pákistandyq Hýzaıfa Abdýl Rehmanmen sheberlik baıqasty.

Foto: Qazaqstan tennıs federatsııasy

Kezdesý breık almasýmen bastaldy. Tartysty órbigen birinshi partııa sońynda Beıbit toǵyzynshy set-poıntty paıdalana bildi — 7:5.

Ekinshi set barysynda pákistandyq sportshy jaraqat alyp qalǵannan keıin Juqaevtyń basymdylyǵy tipti arta tústi — 6:0.

Báseke 1 saǵat 19 mınýtqa sozyldy.

Osylaısha, Qazaqstan quramasy 2:0 esebimen alǵa shyqty.

Jeksenbi kúni Qazaqstan — Pákistan matchynda taǵy úsh oıyn belgilengen. Qazaqstandyqtarǵa endi bir kezdesýdi jeńispen aıaqtasa, jetip jatyr.

Eske sala keteıik, budan buryn tennısten Devıs kýbogynda Pákstanmen matchta Qazaqstannyń alǵa shyqqanyn jazǵan edik.