Devıs kýbogy: Qazaqstan jasóspirimder quramasy alǵash ret shırek fınalǵa shyqty

ORAL. KAZINFORM – Túrkııanyń Antalııa qalasynda jasóspirimder arasynda Devıs kýbogynyń fınaldyq kezeńinde pleı-off satysyna shyqqan alǵashqy komandalar anyqtaldy.

Komandalyq álem chempıonatynyń toptyq básekesinde Qazaqstan quramasy Gonkongty tize búktirdi. 
Qazaqstandyq jasóspirimder Gonkongpen Shymkentte mamyr aıynda Azııa – Tynyq muhıt aımaǵy boıynsha irikteý týrnıriniń jartylaı fınalynda kezdesip, 2:1 esebimen utqan edi.
Bul joly matchty Damır Jalǵasbaı (№ 198 ITF Juniors) men Nıkolas Chen (№ 298 ITF Juniors) bastady. Birinshi set Damırdiń enshisinde ketti – 6:2. Ekinshisinde Gonkong ókili basym boldy – 6:4. Sheshýshi partııada qazaqstandyq tennısshi jeńisti julyp aldy – 6:3.
Osylaısha, D.Jalǵasbaı úsh saǵatqa jýyq ýaqytqa sozylǵan tartysty básekede mamyr aıyndaǵy irikteýde Chenge ketken eseni qaıtardy.
Ekinshi oıynda Zańǵar Nurlanuly (№ 77 ITF Juniors) Djek Chendi (№ 205 ITF Juniors) qapy qaldyrdy. Birinshi set 6:3 esebimen Zańǵardyń paıdasyna sheshilse, ekinshisinde ol qarsylasyna múldem des bergen joq – 6:3.
Sóıtip, juptyq básekeniń nátıjesine qaramastan, Qazaqstan jasóspirimder quramasy óz tarıhynda alǵash ret Juniors Davis Cup jarysynyń shırek fınalyna merziminen buryn joldama aldy.
Erteń, 13 qarasha kúni V tobynda Qazaqstan Frantsııamen oınaıdy. Frantsııalyqtar da Ońtústik Afrıka Respýblıkasy tennısshilerin jeńgendikten, shırek fınalǵa ótip otyr. Tek Qazaqstan – Frantsııa matchynda qaı quramanyń V tobynan birinshi jáne ekinshi orynmen shyǵatyny sheshiledi.
Eske sala keteıik, budan buryn Devıs kýbogynda Qazaqstan jasóspirimder quramasynyń alǵashqy jeńisine qol jetkizgenin jazǵan bolatynbyz.