Devıs kýbogi: Qazaqstan men Italııa komandalary arasyndaǵy qarsylastar anyqtaldy (FOTO)
ASTANA. QazAqparat - Astanada Devıs kýboginiń 1/8 fınalynda sheberlik synasatyn qarsylastar jerebe tastaý arqyly anyqtaldy.
Esterińizge salaıyq, bul jarys osy demalys kúnderi Qazaqstan men Italııa komandalary arasynda Astanadaǵy Ulttyq tennıs ortalyǵynda ótedi.
«Devıs kýbogine 120-dan astam el qatysady jáne biz Qazaqstan men Italııa komandalarynyń 1/8 oıyndaryndaǵy kezdesýine kórermen bolýymyz kóp nárseni ańǵartady. Birinshiden, bul elimizde tennıstiń qandaı deńgeıde damyp kele jatqanyn bildiredi, óıtkeni biz osy sport túrin damytýda kóptegen jumystar atqaryp jatyrmyz. Taǵy bir aıta ketetini, 1922 jyldan beri Devıs kýbogine qatysyp kele jatqan Italııa sııaqty azýly komandany óz jerimizde qarsy alý biz úshin úlken maqtanysh. Myqtysy jeńiske jetsin!» - dep atap ótti QR tennıs federatsııasynyń bas hatshysy Ádil Bórlibaev.
Jerebe qorytyndysy boıynsha kortqa alǵashqy bolyp Mıhaıl Kýkýshkın shyǵady. Ol ıtalııalyq Sımone Bolelımen sheberlik synasady. Dál osy kúni Andreı Golýbev te Andreas Seppımen oınaıdy.
6 naýryzda Andreı Golýbev pen Fabıo Fonını, sosyn Aleksandr Nedovesov pen Paolo Lorentstsı baq synasady.
8 naýryzda Mıhaıl Kýkýshkın men Andreı Golýbev ıtalııalyq tennısshiler Andreas Seppı jáne Sımone Bollelımen jarysqa túsedi.
Aıta keteıik, Qazaqstannyń ulttyq erler komandasy bes jyl qatarynan álemdik tennıs elıtasynyń quramyna enip, úzdik ondyqta turaqtap keledi. Sońǵy bes jyl ishinde erler quramasy týrnırdiń shırek fınalyna 3 ret shyqty. Byltyr da shırek fınalǵa joldama alyp, 3:2 esebimen shveıtsarlyqtarǵa jol berdi. Olar óz kezeginde Devıs kýboginiń jeńimpazdary atanǵan bolatyn. Al ıtalııalyqtar jartylaı fınalda Shveıtsarııa quramasynan utyldy.
Qazaqstan Devıs kýbogine osymen 19-ret qatysqaly otyr. Álemdik topta - 5 jyl (2011 jyldan beri) qatarynan osy dodaǵa atsalysyp keledi.
Oıyndar Astanadaǵy Ulttyq tennıs ortalyǵynda 6-8 naýryz aralyǵynda ótedi.
