Devıd Nemırovskı «Barys» hokkeı klýbynyń bas bapkeri qyzmetine taǵaıyndaldy

ASTANA. KAZINFORM - Devıd Nemırovskı «Barys» hokkeı klýbynyń bas bapkeri qyzmetine taǵaıyndaldy. 

Bul jóninde komandanyń baspasóz qyzmeti resmı túrde málimdedi.

Kanadalyq mamanmen jasalǵan kelisim-shart bir jylǵa eseptelgen.

Devıd Nemırovskı Qurlyqtyq hokkeı lıgasynda 2015 jyldan beri eńbek etip keledi. Aldymen «Admıralda» sporttyq dırektor qyzmetin atqarǵannan keıin tórt jyl boıy «Torpedo» komandasyn jattyqtyryp, úsh márte Gagarın kýbogy pleı-off kezeńine shyqty. 

Ótken maýsymda maman Novosibirdiń «Sıbır» komandasynyń bas bapkeri boldy.

«Bas bapkerdi tańdaýda Nemırovskıdiń kandıdatýrasyna toqtaýǵa sheshim qabyldadyq. Oǵan Astana men Qazaqstan jaqsy tanys. Óıtkeni ózi de kezinde «Barys» sapynda oıyn kórsetti. Endi ony basqa qyrynan baıqap kóremiz. Jaqynda jańartylǵan bapkerler shtabyn jarııalaımyz jáne aldaǵy maýsymǵa quram jasaqtaýdy jalǵastyramyz», - dedi «Barys» hokkeı komandasynyń bas menedjeri Oleg Bolıakın.

Eki jyldan beri elordalyq klýb Qurlyqtyq hokkeı lıgasynda pleı-off satysyna shyǵa alǵan joq.

Byltyr komandada Andreı Skabelka, Ǵalym Mámbetálıev, Oleg Bolıakın bas bapker qyzmetin atqardy.

Eske salsaq, budan buryn shaıbaly hokkeıden Qazaqstan quramasy Ulybrıtanııamen joldastyq kezdesýde jeńiske jetti.