Ulybrıtanııa Syrtqy ister mınıstri Devıd Kemeron Qazaqstanǵa keledi

ASTANA. KAZINFORM – 24-25 sáýirde Ulybrıtanııa jáne Soltústik Irlandııa Qurama Koroldiginiń Syrtqy ister, Dostastyq jáne halyqaralyq damý mınıstri Devıd Kemeronnyń Qazaqstan Respýblıkasyna sapary ótedi. Bul týraly Syrtqy ister mınıstrligi habarlady.

Astanada D.Kemeron memleket basshylyǵynyń qabyldaýynda bolyp, Premer-Mınıstrdiń orynbasary – Syrtqy ister mınıstri Murat Nurtileýmen kelissózder ótkizedi.

Sapar aıasynda saıası, saýda-ekonomıkalyq jáne mádenı-gýmanıtarlyq salalardaǵy ekijaqty yntymaqtastyq máselelerin, sondaı-aq ózekti óńirlik jáne halyqaralyq taqyryptardy talqylaý josparlanyp otyr.

Sapar qorytyndysy boıynsha birqatar ekijaqty qujattarǵa qol qoıylady degen jospar bar.

Buǵan deıin Ulybrıtanııanyń burynǵy premer-mınıstri Devıd Kemeronnyń Tájikstanǵa sapary týraly habarlanǵan bolatyn. Al 22-23 sáýirde Ulybrıtanııa Syrtqy ister mınıstri Lord Devıd Kemeron qyrǵyz áriptesiniń shaqyrýymen Qyrǵyzstanǵa resmı saparmen baratynyn jazǵan bolatynbyz.