Devıd Bekhem Ulybrıtanııanyń alǵashqy mıllıarder sportshysy atandy
ASTANA. KAZINFORM — Bekhem otbasynyń qazir jalpy baılyǵy 1,185 mlrd fýnt sterlıngti quraıdy, bir jyl buryn ol shamamen 500 mln fýnt sterlıngke baǵalanǵan, dep habarlaıdy Kazinform agenttiginiń Londondaǵy menshikti tilshisi.
Sunday Times gazetiniń Ulybrıtanııanyń eń dáýletti adamdary men otbasylarynyń 2026 jylǵa arnalǵan reıtıngi Devıd Bekhemniń el tarıhynda alǵashqy mıllıarder sportshy retindegi mártebesin rastady.
«Manchester ıÝnaıtedtiń» burynǵy jartylaı qorǵaýshysy baılyǵynyń artýy negizinen AQSh-qa salynǵan ınvestıtsııalar men fýtbol-jobalaryna qatysýymen baılanysty.
Onyń negizgi aktıvi Bekhemniń birlesken menshigindegi amerıkalyq «Inter Maıamı» klýby bolyp qala beredi. Onyń quny shamamen 1,45 mlrd dollarǵa baǵalanyp otyr, al klýb kapıtaldandyrylýynyń ósýi negizinen Lıonel Messıdiń kelýimen jáne komandanyń kommertsııalyq tartymdylyǵynyń artýymen, sonyń ishinde onyń kelisimshartyn 2028 jylǵa deıin uzartýmen baılanysty.
Anglııa quramasy burynǵy kapıtanynyń tabysy Adidas jáne Hugo Boss sııaqty álemdik brendtermen uzaq merzimdi kelisimsharttardan da qalyptasyp otyr.
Spice Girls tobynyń burynǵy múshesi Vıktorııa Bekhem jyldyq tabysy 100 mln fýnt sterlıngten asatyn jeke sán brendin damytý arqyly otbasynyń baılyǵyna aıtarlyqtaı úles qosty.
Osyǵan deıin Devıd Bekhem sport pen qaıyrymdylyqqa qosqan erekshe úlesi úshin rytsar atanǵanyn habarladyq.
