Devıd Bekhem sırııalyq balalardy qoldaýǵa shaqyrdy
ASTANA. 20 qyrkúıek. QazAqparat - Óz erkimen BUU Balalar qorynyń elshisi bolǵan Devıd Bekhem álem qaýymdastyǵyn sırııalyq balalardyń basyndaǵy qıyn jaǵdaıdy umytpaýǵa shaqyrdy, dep habarlaıdy 24.kz saıtynan.
«Olar mundaı ómirdi tilep alǵan joq. Soǵan qaramastan qıynshylyqtan kóz ashpaı otyr. Sırııalyqtardyń keleshegi sanalatyn tutas bir býynnyń joǵalyp ketý qaýpi bar. Sol sebepti, sırııalyq jetkinshekterdiń taǵdyryna beıjaı qaramaý kerek», - dep aıtylǵan ashyq hatta. Bul ashyq hatqa brıtan fýtbol juldyzynan ózge esimi elge tanymal qoǵam qaıratkerleri de qol qoıǵanyn aıta ketý kerek.
«Sizderdiń qaıyr-sadaqalaryńyz aýrýdyń aldyn alý úshin vaktsına satyp alýǵa, oqýyn jalǵastyrýǵa jáne bastaryna túsken náýbetti kótere alýy úshin ózgelerdiń kómegin sezinýine múmkindik beredi», - delingen ashyq hatta.
Dúnıejúzilik mańyzy bar atalmysh balalar uıymynyń saıtynda jaryq kórgen málimdemede keltirilgen derekke sáıkes kún saıyn Sırııa shekarasyn eki jarym myńdaı bala kesip ótetin kórinedi. Bir jylǵa tolar-tolmas ýaqytta kámelet jasyna jetpegen sırııalyq bosqyn balalar sany 70 myńnan bir mıllıonǵa deıin ósken.
«Manchester ıÝnaıted», «Real Madrıd» jáne «Los-Andjeles Gelaksı» syndy azýly komandalardyń quramynda oıyn órnegin kórsetken Devıd Bekhemniń tórt bala tárbıelep otyrǵanyn aıta ketý kerek.
Osydan bir jyl buryn Serra-Leonda bolyp, anasy aıaǵy aýyr kezde toıa tamaq jemegeni úshin olardyń balalary aýrýshań ári álsiz bolyp ósip kele jatqanyn óz kózimen kórgen ol el premer-mınıstri Devıd Kemeronmen kezdesip, ashyq hatty qolyna ustatqan edi.
London olımpıadasynyń ashylý qarsańynda ataq-dańqy jer jarǵan aıaq dop perisi Afrıkadaǵy ashtyqtyń azabyn tartyp jatqandardyń basyndaǵy aýyr jaǵdaıǵa álem jurtshylyǵynyń nazaryn aýdarmaq bolǵan edi.
Sırııadaǵyy balǵyndardyń taǵdyryna qatysty úndeýge álemge áıgili fýtbolshydan ózge brıtandyq veloshabandoz, birneshe márte álem chempıony atanǵan ári olımpıada oıyndarynyń jeńimpazy Krıs Hoı, birtalaı fılmde Tonı Blerdiń beınesin somdaǵan akter Maıkl Shın, «Cherchıll» kınokartınasynda basty róldi oınaǵan Tom Hıddlston, ánshi, aktrısa jáne fotomodel Kılı Hoýs jáne taǵy basqa tanymal tulǵalar qoldaryn qoıǵan edi.
