Devalvatsııaǵa bastaıtyn negiz kórip otyrǵan joqpyz – KASE basshysy teńge baǵamy týraly

ASTANA. KAZINFORM – Qazaqstan qor bırjasynyń basqarma tóraıymy Alına Aldambergen teńge baǵamy qalaı qubylýy múmkin ekeni týraly paıymyn aıtty.

«Maýsym aıynda teńgeniń dollarǵa qatysty baǵamy aıtarlyqtaı ózgerdi. 480-ge deıin baryp, qazir 474-ke qaraı tústi. Jalpy bizdiń sarapshylardyń baǵalaýynsha, devalvatsııaǵa bastaıtyn salmaqty negiz kórip otyrǵan joqpyz. Tek tehnıkalyq nıýanstar bar – alǵashqy jarty jyldyqta teńge baǵamyn qoldaý úshin Ulttyq qordan aıtarlyqtaı kóp dollar satylyp ketti. Bul jerde dollardyń ózge de valıýtalarǵa qatysty baǵamy qandaı bolǵanyna kóp dúnıe baılanysty. Men Qazaqstandaǵy jaǵdaı aıtarlyqtaı jaǵymdy dep oılaımyn. Jalpy ishki ónimimizdiń ósimine baılanysty boljamdar joǵary bolyp tur. Birinshi jáne ekinshi jarty jyldyqtarda JІÓ qalaı qalyptasqanyn kóremiz», - dedi ol.

Sondaı-aq ol teńgeniń qubylýy ınvestıtsııalyq tartymdylyqqa qalaı áser etetini týraly pikir bildirdi. 

«Bul jerde túrli baǵalaý tásili bar. Birinshiden, teńgeniń quldyraýy júıeli qubylys pa, álde básekege baılanysty tómendedi me degendi anyqtap alý kerek. Menińshe, irgeli faktorlar sol kúıinde qalyp otyr. Teńge baǵamy bolýy kerek deńgeıden myǵym bolǵan shyǵar. Sondyqtan belgili bir quldyraý boldy. Bir jaǵynan bul quldyraý kúrt oryn aldy deýge bolady. Endi ǵana qalypqa túsip jatyr. Al jalpy Qazaqstan ekonomıkasynyń irgeli faktorlary aıtarlyqtaı jaǵymdy. AQSh-ta, Eýropada aqsha-nesıe saıasaty qatań kúıinde qalǵandyqtan jalpy ishki ónimniń ósimi tómendep keledi. Osy qatań aqsha-nesıe saıasatynyń áserinen ınflıatsııa deńgeıi túsip, bazalyq mólsherleme qalpyna qaıtyp kele jatyr. Biraq sonymen birge JІÓ tómendep jatyr. Qazaqstanda da byltyrmen salystyrǵanda JІÓ túsip keledi. Biz bári bir JІÓ ósip jatqan óńirdemiz. Sondyqtan jalpy teńge baǵamy jyldyq boljamdar deńgeıinde qalady dep oılaımyn», - dedi Alına Aldambergen. 

Eske salsaq, buǵan deıin maýsym aıynda rýbl-teńge saýdasy eki ese artqanyn jazǵan edik.