Devalvatsııa kútip otyrǵan joqpyz – Oljas Bektenov

ASTANA. KAZINFORM – Premer-mınıstr Oljas Bektenov Úkimet otyrysynan keıin ótip jatqan baspasóz máslıhatynda Qazaqstan ekonomıkasyn damytýdyń bazalyq stsenarıi shyndyqqa jaqynyraq degen paıym aıtty.

- Bizdiń baǵalaýymyz boıynsha, salmaqty sarapshylardyń kóbiniń baǵalaýy boıynsha teńge baǵamynyń kúrt álsireýine ákeletin alǵysharttar joq. Bıýdjetke qandaı parametrler engizilgen degenge kelsek, qazir biz bazalyq stsenarııdi ustanyp otyrmyz. Dollar baǵamy 540 teńge, bir barrel munaıdyń baǵasy 60 dollar dep belgilengen. Pessımıstik stsenarıı de bar. Eger kenetten munaı baǵasy barreline 50 dollarǵa deıin tússe, basqa tetikter iske qosylady. Biraq bazalyq stsenarııdiń oryndalýy shyndyqqa jaqynyraq dep esepteımiz, - dedi ol BAQ ókiliniń suraǵyna bergen jaýabynda.

Premer-Mınıstr jýrnalısterge kenet devalvatsııa bolmaıtynyn senimdi túrde aıtty.

- Biz devalvatsııa kútip otyrǵan joqpyz. Teńge baǵamynyń kenet túsýi bolmaıdy, - dedi Úkimet basshysy.

Aıta ketsek, búgingi Úkimet otyrysynda Premer-Mınıstrdiń orynbasary – Ulttyq ekonomıka mınıstri Serik Jumanǵarın Úkimet otyrysynda jyldyń 6 aıynda el ekonomıkasy 6,2 paıyz ósim kórsetkenin málim etken edi.