Destrýktıvti dinı aǵym ókilderi Aqtaý turǵynynan 8 mln teńge bopsalaǵan
«Mańǵystaý oblysy Polıtsııa departamentiniń Ekstremızmge qarsy is-qımyl basqarmasynyń qyzmetkerlerine destrýktıvti dinı aǵymdy ustanýshylardyń aldyn ala sóz baılasý boıynsha adamdar tobymen aqsha bopsalaýmen aınalysatyny týraly jedel aqparat kelip tústi»,-delingen saıttaǵy materıalda.
Osy jyldyń 13 qyrkúıeginde saǵat 23:30 shamasynda belgisiz bireýler jábirlenýshini Aqtaý qalasynyń shaǵyn aýdandarynyń birinde ornalasqan jaldamaly páterge aldap ákelip, tapansha, elektroshoker jáne pyshaqpen qorqytyp, bopsalaý jolymen jábirlenýshiden 8 mln teńge mólsherinde aqshalaı qarajat talap etken jáne ózderiniń is-áreketin uıaly telefon kamerasyna túsirgen.
Bul derek Mańǵystaý oblysy Polıtsııa departamentiniń sotqa deıingi tergeýdiń biryńǵaı tizilimine QR QK-niń 194-baby 2-bóligi jáne 126-baby 2-bóligi boıynsha tirkeldi.
Mańǵystaý oblysy PD Ekstremızmge qarsy is-qımyl basqarmasy jáne Uıymdasqan qylmysqa qarsy kúres basqarmasynyń qyzmetkerleri Mańǵystaý oblysy Ulttyq qaýipsizdik komıteti departamentiniń qyzmetkerlerimen birlesip, Mańǵystaý oblysynyń aýmaǵynda jedel-izdestirý is-sharalaryn ótkizý barysynda bir mezgilde kúdikti destrýktıvti dinı aǵymnyń tórt jaqtaýshysyn anyqtap, ustady.
Olarǵa qatysty tintý is-sharalary júrgizildi. Barlyq zattaı dálelder tárkilendi. Tórt adamnan turatyn toptaǵy adamdardyń barlyǵy ýaqytsha ustaý ızolıatoryna qamaldy, sot sanktsııasymen barlyǵy qamaýǵa alyndy.
Foto: polisia.kz
