Destrýktıvti aǵymdardyń jeteginde ketetin azamattardyń sany azaıatyn emes -QR UQK

ASTANA. QazAqparat - QR Ulttyq qaýipsizdik komıteti tóraǵasynyń orynbasary Nurǵalı Bilisbekovtyń aıtýynsha, Qazaqstan azamattarynyń destrýktıvti aǵymdardyń jeteginde ketý dınamıkasy báseńdemeı otyr, dep xabarlaıdy QazAqparat tilshisi.

"Negizgi másele mynada, radıkaldy aǵymdarǵa qarsy nasıxat jumystary baıaý júrgiziledi. Búginde osy sharalarmen mektep oqýshylary men stýdentter qamtylǵan. Alaıda jumyssyz júrgen jastar, margınaldy toptar jáne taǵy basqalardy radıkaldy aǵymdarǵa qarsy nasıxatpen qamtý kórsetkishi 10 paıyzdan aspaı otyr. Osyǵan baılanysty aqparattyq túsindirý jumystaryn kúsheıtý kerek. Aldymen radıkaldy ıdeıalar men kózqarastarǵa berilgender arasynda ol jumysty keńinen júrgizgen jón. Sóıtip, ekstremıstik ıdeologııanyń áleýmettik negizin buzý qajet. Ásirese, salafızmniń jaqtastary arasynda túsindirý sharalaryn kúsheıtken durys. Sebebi dál osy ıdeologııa jańa radıkaldy toptardyń negizi bolyp sanalady", - dedi Bilisbekov Úkimettiń búgingi otyrysynda.

Aıta keteıik, otyrys barysynda Nurǵalı Bilisbekov komıtet basshysynyń orynbasary Sankt-Peterbýrg qalasyndaǵy teraktige qatysty buqaralyq aqparat quraldarynda tarap júrgen aqparatqa da túsinikteme berdi. Osy oqıǵaǵa baılanysty Qazaqstanda qaýipsizdik sharalary kúsheıtildi .  Jalpy, ótken jyly elimizdiń arnaıy organ qyzmetkerleri 12 lańkestik aktsııanyń jolyn kesti . Sondaı-aq Reseı jerinde úsh teraktiniń aldyn alýǵa kómektesti .