Destrýktıvti nasıhattarǵa bizdiń elimizdegi balalar da ilesip ketip júr – Memleket basshysy
ASTANA. KAZINFORM - Ulttyq quryltaıdyń úshinshi otyrysynda sóılegen sózinde Prezıdent Qasym-Jomart Toqaev dástúrimizge jat dinı nanym-senim men mádenıet týraly aıtty.
«Biz halqymyzdyń rýhanı negizin qurmetteı otyryp, memleketimizdiń zaıyrly el retindegi mártebesin kúsheıte túsýimiz kerek. Qazaqstan óziniń memlekettiligine jáne qoǵamdyq moralyna qaıshy kelmeıtin dinı nanym-senimderdiń, túrli tanymdar men ilimderdiń bárine túsinistikpen qaraıdy. Biraq biz batystyń, ıa bolmasa basqa da kózqaras ıeleriniń yqpalymen tól mádenıetimizge jat ári álemniń dýalıstik negizine kereǵar qundylyqtardy nasıhattaýshylardyń jetegine erip kete almaımyz, ketpeımiz de!», - dedi Prezıdent.
Memleket basshysy sózinde, destrýktıvti nasıhattarǵa bizdiń elimizdegi balalar da ilesip ketip júrgenin atap ótti. Sondyqtan munyń zardap-zalaly óte zor bolýy múmkin. Tarazy basynda óskeleń urpaqtyń rýhanı jaǵynan saý-salamatty bolý máselesi tur. Bizdiń osyǵan qatysty ustanymymyzǵa saıası ahýal da, jer júzinde sánge aınalǵan jańa úrdister de áser ete almaıdy.
«Biz dástúrli otbasy qundylyqtaryn tabandy túrde ornyqtyra berýimiz qajet. Islam qaǵıdalaryn óreskel burmalap, qatyp qalǵan dogma retinde qabyldaıtyn otbasylardaǵy áıelderdi kemsitý, tipti qorlaý faktilerine erekshe nazar aýdarǵan jón. Mundaı otbasylardyń turmys-tirshiligi ǵylym men tehnıkanyń jetistikterine toly XXI ǵasyrdyń ómir saltyna múlde úılespeıtin soraqy tyıymdar men tártipterge negizdelgen. Keıbir adamdar ádeıi keri ketýdi qalap, orta ǵasyrlarǵa tán eski tanym-túsinik pen is-áreketke boı uratyn sııaqty kórinedi»,-dedi memleket basshysy.
