Desanttyq-shabýyldaý áskerleriniń jaýyngerlik ázirligi tekserilip jatyr
ASTANA. KAZINFORM – Qazaqstan Respýblıkasynyń Qarýly kúshterinde Desanttyq-shabýyldaý áskerleriniń jaýyngerlik ázirligi qaýyrt tekserilip jatyr.
Qorǵanys mınıstri avıatsııa general-leıtenanty Dáýren Qosanovtyń basshylyǵymen uıymdastyrylǵan bul shara quramalar men áskerı bólimderge júktelgen mindetterdi oryndaý qabiletin baǵalaýǵa baǵyttalǵan.
Keń aýqymdy ınspektsııa osy jyldyń 19 aqpanyna deıin jalǵaspaqshy. Tekserý aıasynda polıgondarda oqý-jaýyngerlik tapsyrmalar keshenin oryndaý da kózdelgen. Bólimsheler jaýyngerlik daıarlyqtyń mejeli deńgeıine keltirilip, belgilengen aýdandarǵa jiberiledi.
Tekserý barysynda negizgi jaýapkershilik Desanttyq-shabýyldaý áskerleriniń qolbasshysyna júkteledi. Ol bólimshelerdiń belgilengen aýdandarda ýaqytynda shuǵyl ornalasýyn jáne daıyndyq kezeńinde de, jaýyngerlik oqý-jattyǵý is-qımyldary barysynda da úzdiksiz basqarylýyn qamtamasyz etýi tıis.
Jeke quram úsh kún boıy rotalyq taktıkalyq toppen ótkiziletin taktıkalyq jattyǵý aıasynda praktıkalyq is-qımyldy pysyqtaıdy. Jattyǵý josparyna qaraı bólimsheler eldimekenderdi zańsyz qarýlanǵan shartty toptardan tazartý mindetterin oryndaıdy. Odan bólek jaýyngerlik tehnıkanyń jaraǵy men atys qarýynan oq atý júrgiziledi.
Áskerı qyzmetshiler sondaı-aq, jaýyngerlik daıarlyqtyń negizgi pánderinen de synaq tapsyrady. Ásirese dene daıarlyǵy, shtattyq qarýdan atys júrgizý daǵdylary, taktıkalyq medıtsına, baılanys quraldarymen jumys jáne ózge de beıindik pánder boıynsha daıarlyq deńgeıi jiti nazarǵa alynatyn bolady.
Qorǵanys mınıstri jeke quramnyń jan-jaqty daıarlyǵyn qamtamasyz etý, jarǵy qaǵıdalaryn qatań saqtaý jáne qarý-jaraq pen áskerı tehnıkany qoldaný kezinde qaýipsizdik sharalaryn múltiksiz oryndaý qajettigin atap ótti.
Tekserý sońynda Desanttyq-shabýyldaý áskerleriniń ózderine júktelgen mindetterdi oryndaýǵa daıyndyǵy keshendi túrde baǵalanady.
Aıta ketelik 16-18 aqpan aralyǵynda Almaty, Qonaev jáne Taldyqorǵan qalalarynda áskerı tehnıkalar tasymaldanatyny týraly jazǵan edik.