Desanttyq-shabýyldaý áskerleriniń qurylǵanyna 25 jyl – fotoreportaj
QONAEV. KAZINFORM – Búgin Qonaev qalasyndaǵy 32363 áskerı bóliminde Qazaqstannyń Desanttyq-shabýyldaý áskerleriniń qurylǵanyna 25 jyl tolýyna arnalǵan saltanatty is-shara ótti.
Merekelik is-shara desantshy kapıtan Qaırat Qudabaevtyń eskertkishine gúl shoqtaryn qoıý rásimimen bastaldy.
QR Desanttyq-shabýyldaý áskerleriniń qolbasshysy general-maıor Almaz Jumakeev sarbazdan bastap, generalǵa deıin sara joldy ótý ońaı sharýa emes ekenin atap ótti. Ol osy saladaǵy barlyq býyn ókilderiniń áskerdiń qalyptasýy men damýyna qosqan úlesin tilge tıek etti.
– Qazaqstannyń desantynyń tarıhyn aıtyp óter bolsam, 1991 jyly Keńes Odaǵy Qorǵanys mınıstriniń sheshimimen 35-gvardııalyq desanttyq-shabýyldaýshy brıgada Kotbýs qalasynan Kapshaǵaıǵa kóshirildi.1992 jyldyń 13 mamyrynda bul brıgada Qazaqstan Qarýly Kúshteriniń quramyna ótti. Osy sátten bastap Qazaqstan armııasynda óz desanty – 35-gvardııalyq brıgada paıda boldy, – dedi Almaz Jumakeev.
2000 jyldyń 6 shildesinde Memleket basshysynyń Jarlyǵymen mobıldi kúshter qurylyp, olardyń quramyna 35-brıgada da endi.
– Qazir bizdiń quramda 13 áskerı bólim bar. Biz 1500 adamnan 9000-ǵa jýyq quramǵa deıin óstik. Qazaqstan Qarýly Kúshteri ishinde alǵash ret dál osy desanttyq-shabýyldaýshy áskerlerde ushqyshsyz áýe júıe bólimi quryldy. Qurlyqtaǵy top quramynda alǵash ret radıoelektrondyq kúres jáne radıoelektrondyq barlaý bólimshesi paıda boldy. Barlaý bólimshelerin – batalondardaǵy barlaý vzvodtarynan bastap jeke barlaý polkine deıin tolyq qalpyna keltirdik. Baılanys bólimsheleri tolyq jańǵyrtyldy. Batalondarda barlaý jáne baılanys bastyqtarynyń laýazymdary engizildi, – dedi Almaz Jumakeev.
25 jyl ishinde desanttyq-shabýyldaýshy áskerler qatarynan 18 general shyqty, 300-den astam ofıtser polkovnık shenin aldy, 107 áskerı qyzmetshi áskerdiń damýyna qosqan eleýli úlesi úshin memlekettik nagradalarmen marapattaldy.
Desanttyq-shabýyldaýshy áskerler joǵary daıyndyq deńgeıin kórsetip, mańyzdy mindetterdi atqarýdy jalǵastyryp keledi.
Saltanatty shara aıasynda desanttyq-shabýyldaý quramasynyń áskerı qyzmetshileri jaýyngerlik daıyndyqtyń elementterin kórsetti.
Merekeniń eń áserli sáti – jeke quramnyń parashıýtpen sekirýi boldy. Osylaısha, qazaqstandyq desanttyń sheberligin pash etti.
Shara merekelik kontsertpen aıaqtaldy.
Osyǵan deıin áskerı qyzmetshilerge aqshalaı rızyq tóleý qaǵıdalary Konstıtýtsııaǵa sáıkestendirilgeni týraly jazǵanbyz.