Desantshylar qalalyq jaǵdaıda jaýyngerlik is-qımyl tásilderin pysyqtady

NUR-SULTAN. QazAqparat – Desanttyq-shabýyldaý áskerleriniń bólimsheleri «Batyl toıtarys-2022» keshendi vedomstvoaralyq strategııalyq komandalyq-shtabtyq oqý-jattyǵýynyń negizgi kezeńinde qalalyq jaǵdaıda jaýyngerlik is-qımyl júrgizýdiń taktıkalyq tásilderin pysyqtady, dep habarlaıdy QazAqparat Qorǵanys mınıstrligine silteme jasap.

Eldi mekenderde urys júrgizýdiń ereksheligi - jeke quramnyń daıarlyq deńgeıiniń joǵary bolýyn talap etedi. Osyǵan baılanysty oqý-jattyǵý barysynda áskerler qyzmetiniń atalǵan baǵytyna erekshe nazar aýdaryldy.

Oqý-jattyǵýdyń jospary boıynsha barlaý, artıllerııalyq, ınjenerlik-saperlik bólimshelerdiń jáne ushqyshsyz basqarylatyn qurylǵylardyń eseptoptarymen kúsheıtilgen desanttyq-shabýyldaý batalony quramyndaǵy batalondyq taktıkalyq top arnaıy operatsııalar kúshteri jáne Ulttyq ulannyń áskerı qyzmetshilerimen birge is-qımyl jasaı otyryp, bandalyq toptar basyp alǵan eldimekendi azat etý tapsyrmasyn oryndady.

Aýmaqty barlaǵannan keıin desantshylar armııa avıatsııasyndaǵy tikushaqtar tobynyń kómegimen shartty qarsylasty aınalyp ótip, oǵan oq jaýdyrdy.

Injenerlik-saperlik bólimsheler ǵımarattarǵa kiretin joldy, azat etilgen nysandardy mınadan tazartyp, negizgi kúshterdiń alǵa jyljýyn qamtamasyz etti.

Barlyq ǵımarattardy alǵan soń Ulttyq ulan bólimsheleri jumysqa kiristi. Olar eldi mekendi tazartyp, qoǵamdyq tártipti saqtaý sharalaryn uıymdastyrdy.

Oqý-jattyǵýdyń belsendi kezeńine qatysqan QR Qorǵanys mınıstri, general-leıtenant Rýslan Jaqsylyqov áskerı qyzmetshilerdiń daıarlyq deńgeıin baǵalap, oqý-jaýyngerlik tapsyrmalardy birlesip oryndaý barysynda kúshtik qurylymdardyń ózara is-qımylyn qoldaý jóninde nusqaýlar berdi.

Eske sala keteıik, «Batyl Toıtarys-2022» vedomstvoaralyq oqý-jattyǵýy 6 sáýirden beri júrip jatyr.