Desantshy qyzdar erekshe chellendj bastady
ASTANA. KAZINFORM — Qarýly kúshterdiń Qonaev garnızonyndaǵy desanttyq-shabýyldaý brıgadasynyń áskerı qyzmetshileri parashıýtpen josparly sekirýdi oryndady. Bul týraly Qorǵanys mınıstrliginiń baspasóz qyzmeti málim etti.
Qorǵanys mınıstrliginiń málimdeýinshe, 13 desantshy qyz halyqaralyq áıelder kúni qarsańynda «Men mamandyǵymdy jaqsy kóremin» atty chellendjini bastaǵan.
«Qyzdardyń bári 35-shi gvardııalyq desanttyq-shabýyldaý brıgadasynda bir jyldan astam ýaqyt qyzmet etip keledi jáne olardyń birazy keminde úsh ret parashıýtpen sekirgen. Názik jandylardyń kóbi desanttyq-shabýyldaý bólimsheleriniń sanıtarlyq nusqaýshylary laýazymdarynda qyzmet etedi jáne parashıýtpen sekirý olar úshin qaýipti emes, jaýyngerlik daıyndyq elementteriniń biri bolyp sanalady» - dep málimdedi vedomstvonyń baspasóz qyzmeti.
Efreıtor Aınur Mahantaeva áýeden parashıýtpen sekirýge alǵash ret qadam basty. Arý qyz sekirýge uzaq daıyndalǵanyn aıtady. Bastapqyda qorqynyshty bolǵanmen, dostary men áriptesteri ony jerde de, tikushaqta da qoldap otyrdy.
— Eki aı boıy men sekirýge daıyndaldym, D-6 4 serııaly parashıýt júıesiniń barlyq taktıkalyq-tehnıkalyq sıpattamalary men quramdas bólikterin, durys oralýyn muqııat úırendim. Áýe-desanttyq kesheninde sekirýdiń jerdegi elementteri, sonyń ishinde shtattan tys jaǵdaılardy da pysyqtadym, — deıdi Aınur.
Brıgada komandıriniń áýe-desanttyq daıyndyq jónindegi orynbasary podpolkovnık Abdýrahım ıÝldashevtiń aıtýynsha, ásirese qyzdar múmkindiginshe jıi sekirýdi qalaıdy eken, sebebi olardy Desanttyq-shabýyldaý áskerlerindegi qyzmeti yntalandyratyn kórinedi.
Desantshylar «Men mamandyǵymdy jaqsy kóremin» chellendjin bastap, pogon kıgen qyzdardy osy bastamany qoldaýǵa shaqyrady.
Osy kúni 35-shi desanttyq-shabýyldaý brıgadasynan barlyǵy 160-tan asa áskerı qyzmetshi parashıýtpen sekirdi, onyń ishinde 96 adam — áskerı boryshyn ótep júrgen sarbazdar.
