Desantshy barlaýshylardy qalaı daıarlaıdy
ASTANA. KAZINFORM — Qonaev qalasy mańyndaǵy Desanttyq-shabýyldaý áskerleriniń oqý-jattyǵý ortalyǵynda Almaty, Qonaev jáne Jetisý garnızondarynyń barlaý bólimshelerine josparly dalalyq jıyn ótip jatyr. Bul týraly Qorǵanys mınıstrliginiń baspasóz qyzmeti habarlady.
Atalǵan oqý-jattyǵý ortalyǵy merzimdi qyzmettegi jáne kelisimshart boıynsha áskerı qyzmetshilerdi keshendi daıarlaýǵa arnalǵan zamanaýı ınfraqurylymmen jabdyqtalǵan. Sabaqtar qaýipsizdik talaptaryna saı, urys jaǵdaıyna barynsha keltirilip uıymdastyrylǵan.
«Qalqan» laqap atty maıordyń aıtýynsha, barlaýshylardy daıarlaý barysynda tájirıbelik daıyndyqqa basymdyq beriledi.
Dalalyq joryqtar jaýyngerlik jáne taktıkalyq-arnaıy daıyndyq daǵdylaryn pysyqtaýǵa, bólimshe quramynda áreket etýge jáne kúrdeli jaǵdaıda jedel sheshim qabyldaýǵa múmkindik beredi.
Jıyn aıasynda desantshylar bazalyq lagerlerdi ornalastyrý erejesin meńgerip, baılanys quraldarynyń ár túrin, mınalaý-jarý isiniń elementterin, taktıkalyq medıtsınany jáne ushqyshsyz ushatyn qurylǵylardy basqarýdy úırenýde. Odan ózge avtomat, tapansha, pýlemet jáne Dragýnov mergendik vıntovkasynan oq atý jattyǵýlary ótkiziledi. Áskerı qyzmetshiler qaraýyldardy jasyryn túrde joıý tásilderin, pyshaq pen saper kúregin laqtyrý ádisterin de pysyqtamaq.
Barlaý bólimsheleri búrkemelengen baqylaý oryndarynan baqylaý júrgizýge, top quramynda áreket etýge, shartty qarsylasty kúshpen ustaýǵa, jergilikti jerdi baǵdarlaýǵa, transheıada jáne oıly-qyrly jerde urys júrgizýge jattyǵady.
Jeke quramnyń taǵylymdamasyna jáne kásibı ósýine erekshe nazar aýdarylyp otyr.
Kúzde áskerge alynǵan sarbazdar arasynda úzdik nátıjeler kórsetken áskerı qyzmetshiler de bar. Solardyń biri — Nógerbek Tátimbek. Ol nebári úsh aı qyzmet etkennen keıin kishi serjant ataǵyn alyp, bólimshe komandıri bolyp taǵaıyndaldy.
Sarbazdyń sózinshe, dalalyq jaǵdaıdaǵy sabaqtar barlaýshy qyzmetiniń mánin tereń túsinýge múmkindik berip, jaýapkershilik pen jaýyngerlik rýhty qalyptastyrady.
Kishi serjant Tátimbek joǵary oqý ornyn «keden isi» mamandyǵy boıynsha támamdaǵan. Aǵasynyń keńesimen ol óz qalaýymen Desanttyq-shabýyldaý áskerlerinde qyzmet etýdi tańdaǵan. Áskerı qyzmetshi kıokýshınkaı karateden qara belbeý ıegeri, 2024 jylǵy álem chempıony. Bolashaqta kelisimshart negizinde qyzmetin jalǵastyrýdy josparlap otyr.
Dalalyq jıyndar bólimshelerdiń jaýyngerlik ázirligin arttyrýǵa, jeke quramnyń moraldyq-psıhologııalyq ahýalyn nyǵaıtýǵa jáne barlaýshylardyń kásibı quzyretin damytýǵa yqpal eteri anyq.
Aıta ketelik Oqý-aǵartý men Qorǵanys mınıstrligi oqýshylarǵa arnalǵan birlesken áskerı jıyndar ótkizetini týraly jazǵan edik.