Desant bolý úshin ne isteý kerek
NUR-SULTAN. QazAqparat - Desant bolǵysy keletin jas erte daıyndalady. Shynyǵyp, ekran aldyna kóp ýaqyt shegelenbeı, jaqsy tamaqtanady jáne oǵan qoıylatyn talap ta myqty, dep habarlaıdy Altaınıýs.
«Desantýra, memlekettik kúzet - áskerı qyzmettiń elıtasy sanalady. Jigitterdiń «barǵysy» keletin jeri osy. Biraq onda medıtsınalyq, psıhologııalyq tekseristen ózi de otbasy músheleri de súrinbegen jigittiń syrttany jiberiledi. Iá, ózi jarap turǵan jigittiń otbasy músheleri de jan-jaqty baqylaýdan ótedi. Desantshylar parashıýtpen sekiredi, ádettegi áskerı qyzmetpen salystyrǵanda anaǵurlym kóp júgiredi. Fızıkalyq aýyr jattyǵýlarmen qosa psıhologııalyq qysym qatty», - deıdi oblystyq Qorǵanys isteri jónindegi departamenttiń qyzmetkeri Aınur Ýálıeva.
Iá, osy eki jerde Otan aldyndaǵy boryshyn ótegen jastardyń bólekshe abyroımen oralatyny anyq.
«Osy joly bizdiń oblystan memlekettik kúzet qyzmetine 23 jas attandy. Al jalpy kóktemgi shyqyrylymda 1300 jas sarbaz sapqa turǵyzylyp, ár tarapqa jóneltildi», - deıdi Aınur Ýálıeva.
Olardy shyǵaryp salý rásimi Óskemendegi «Ertis» mádenıet saraıynda ótti. Shara Otan qorǵaýshylar meıramyna oraılastyrylǵan edi.
«Sarbazdardy shyǵaryp salý bizde dástúrge aınalǵan. Munda Qarýly kúshterdiń ardagerleri, ınternatsıonalıst jaýyngerler, kýrsanttar jáne áskerı-patrıottyq úıirmelerdiń tárbıelenýshileri qatysady. Basty maqsat - jastardyń patrıottyq súıispenshiligin oıatý. Sharany jergilikti atqarýshy bılikpen birlesip uıymdastyrdyq», - deıdi departamenttiń bastyǵy Qaıyrbek Qaıyrqanov.
